Саха сирин ытык-мааны олохтоохторо! Улуу Кыайыы үбүлүөйдээх 75 сылын бэлиэтиир кэммит бу тиийэн кэллэ, Улуу Кыайыы күнүн уустук балыһыанньаттан сылтаан үксүбүт дьиэбитигэр-уоппутугар ылыахпыт. Ол да буоллар, Аҕа дойду улуу сэриитигэр кыттыыны ылбыт, тыылга үлэлээбит чугас дьоммутун хайаан да ахтан-санаан ааһарбыт биһиги хас биирдиибит ытык иэспит буолар. Биһиги Аҕа дойду улуу сэриитин кытта эбээлэрбитинэн, эһээлэрбитинэн, аҕаларбытынан ситимнээхпит. Тоҕо инньэ диибиний? Биһиги эбэлэрбит, эһэлэрбит, аҕаларбыт, таайтарбыт, убайдарбыт ити уоттаах сэриигэ фашизмы кыайыыга бэйэлэрин кылааттарын киллэрбиттэрэ. Холобур, Мин эбэм Анна Дмитриевна үс бииргэ төрөөбүт бырааттара Аҕа дойдуларын көмүскэлигэр туруммуттара уонна икки быраата Дмитрий Дмитриевич, Конон Дмитриевич Алексеевтар сэрии толоонугар охтубуттара. Бырааттара Макар Дмитриевич Алексеев ол улуу сэрииттэн этэҥҥэ эргиллэн кэлэн, араас үлэҕэ үлэлээбитэ, ыал буолан, элбэх оҕолонон, сиэннэрэ элбээтилэр. Ийэм Мария Фомична бииргэ үөскээбит, иитиллибит убайа Степан Андреевич Андреев сэрииттэн эмиэ эргиллибэтэҕэ.Улуу Кыайыы үбүлүөйдээх 75, Кэриэстэбил, Албан аат уонна Дойдуга бэриниилээх буолуу сылларын чэрчитинэн, «Ил Түмэн» издательскэй дьиэ сэрии кыттыылаахтарын, тыыл, үлэ бэтэрээннэрин үтүө ааттарын үйэтитэр аналлаах «Якутия Помнит» («Саха сирэ умнубат») өрөспүүбүлүкэ таһымнаах дьоһун сайты үлэлэттэ. Манна Саха сириттэн Аҕа дойду уоттаах сэриитигэр хорсуннук киирсэн Дьоруой аатын ылбыт буойуттар, уоттаах сэрии кыттыылаахтарын, тыылга үлэлээбит эбээлэрбит, эһээлэрбит, аҕаларбыт тустарынан суруйуулар бааллар, кинилэр тустарынан суруйуулар кэккэлэрэ өссө кэҥээн иһиэҕэ.
Ытык-мааны Сахам сирин, олохтоохторо! Бу ураты ис хоһоонноох «ЯкутияПомнит» («Саха сирэ умнубат») бырайыкка көхтөөхтүк кыттан, сэриигэ кыттыбыт, тыылга үлэлээбит, Аҕа дойду сэриитин кэмигэр тулаайах хаалан киһи хара буолбут аҕаларгытын, ийэлэргит, эһээлэргит, эбээлэргит тустарынан суруйууларгытын, ыстатыйалары бу сайтка уган үйэтитиҥ диэн ыҥырабын. Сайт диэн тугун, аныгы технология ис хоһоонун билэр эдэр дьон саастаах дьоҥҥо, эбээлэргитигэр, эһээлэргитигэр көмөлөһөн, кинилэр ахтыыларын, суруйууларын тиһэллэригэр көмөлөһүөххүт диэн эрэнэбин.
Убаастабыллаах Саха сирин олохтоохторо! Yakutia-pomnit.ru сайтка киирэн билсэргитигэр сүбэлиибит уонна Адрес электронной почты защищен от спам-ботов. Для просмотра адреса в вашем браузере должен быть включен Javascript. диэн электроннай почтаҕа суруйууларгытын күүтэбит. Билсэр төлөпүөннэргит: 89644170467, 89618695654. Инстаграм: @yakutia_pomnit
Бары кыттыһан өрөспүүбүлүкэтээҕи өйдөбүнньүк
кинигэни оҥоруоҕуҥ!
-
0
-
0
-
0
-
0
-
0
-
0
