Байыаннай госпитальга сылдьыы
Санкт-Петербурга тиийбит бастакы күнүгэр С.М. Киров аатынан байыаннай-медицинскэй академия госпиталыгар Украинаҕа бара турар анал байыаннай дьайыыларга бааһырыы ылан эмтэнэ сытар Сунтаар, Амма уонна Аллараа Халыма улуустарыттан төрүттээх биир дойдулаахтарын кытта көрүстэ.
Александр Николаевич буойуттары эмтиир, реабилитациялыыр быраастары көрсөн госпиталь үлэтин, ол иһигэр анал байыаннай дьайыы кэмигэр эмсэҕэлээбит байыастар эмтэниилэрин, булгуччулаах страховкалааһын ситимин иһинэн оҥоһуллар көмө боппуруостарын билистэ. Ити туһунан Александр Николевичка госпиталь бэрэстэбиитэлэ Руслан И. сиһилии кэпсээтэ.
Россия этнографическай музейыгар көрсүһүү
Российскай Федерация Санкт-Петербурга баар биир саамай бөдөҥ музейын – Россия этнографическай музейын салалтатын кытта көрсүһүүгэ Александр Жирков Санкт-Петербурга Дьокуускайдааҕы Ем. Ярославскай аатынан музей быыстапкатын тэрийии туһунан кэпсэттэ. Салгыы Ил Түмэн бастакы вице-спикерэ музей дириэктэрэ Юлия Купинаҕа «Саха сирин норуоттарын материальнай уонна духовнай культуралара аан дойду музейдарыгар (XII – ХХ ү.)» диэн аан дойдутааҕы бырайыакка бииргэ үлэлэһии туһунан этии киллэрдэ.
Санатан эттэххэ, «Саха сирин норуоттарын материальнай уонна духуобунай культуралара аан дойду музейдарыгар (XII – ХХ ү.)» бырайыак 2006 с. А.Н. Жирков көҕүлээһининэн тэриллибитэ. 2015 с. Холбоһуктаах Нациялар Тэрилтэлэрин иһинэн аан дойдутааҕы статус ылбыта. 2017 с. тахсыбыт альбом-каталог бастакы томугар Нью-Йорктааҕы Естественнэй устуоруйа Америкатааҕы музейыгар уонна Вашингтоннааҕы Смитсоновскай институт иһинэн Естественнэй устуоруйа Национальнай музейыгар баар 1600-тан тахса музей малын-салын туһунан толору информация уонна бу экспонаттар хаартыскалара киирбиттэрэ.
Иккис кинигэҕэ Германия музейдарыгар: Берлиннээҕи этнологическай музейга, Франкфурт-на Майне куоракка баар Аан дойду норуоттарын культураларын музейыгар, Саксония судаарыстыбаннай этнографическай хомуйууларын ахсааныгар киирэр Лейпицг, Дрезден куораттар музейдарыгар, Геттингенскай университет этнологическай музейыгар хараллан сытар музей малларын ойуулааһын киирбитэ.
Үһүс кинигэ Германия музейдарыгар: Гамбургтааҕы этнографическай музейыгар, Кельн куоракка баар Раутенштраух-Йост этнологическай музейыгар, Штутгартааҕы Линден аатынан музейга, Бремен куорат Уберси этнографическай музейыгар түмүллүбүт экспонаттарга анаммыта сотору кэминэн бэчээттэнэн тахсыахтаах. Бырайыак быһыытынан итинтэн салгыы альбом-каталогка Российскай Федерация музейдарыгар баар мал-сал киириэхтээх.
Александр Жирков уонна Юлия Купина бииргэ үлэлээһиини салгыы кэҥэтэр, хотугу норуоттар историяларын уонна культураларын быыстапкаларын ыытыы кэмигэр чуолкайдыыр наадатын туһунан кэпсэттилэр.
В.В. Никифоров-Күлүмнүүр суолунан
1913 с. саха литературатын уонна искусствотын историятыгар биир бэлиэ суолталаах түгэн буолбута. Романовтар династиялара 300 сылын бэлиэтээһиҥҥэ Саха сириттэн депутация састаабыгар киирсэн, В.В. Никифоров-Күлүмнүүр ити сылга Санкт-Петербурга тиийбитэ. Бу сырыытыгар кини доҕотторун А.С. Заруднай уонна А.А. Фаресова ыҥырыыларынан Санкт-Петербург историческай киинигэр, Михайловскай болуоссакка баар "Бродячая собака» диэн ааттаах литературнай-артистическай кулуупка сылдьыбыта. Оччолорго бу кулууп Санкт-Петербург культурнай олоҕун биир биллэр-көстөр киинэ буолбут кэмэ этэ. Манна үгүс театральнай туруоруулар, поэзия уонна музыка киэһэлэрэ, биллиилээх поэттар уонна суруйааччылар, драматургтар уонна актердар сөбүлээн мустар, уопсастыбаҕа, искусство араас эйгэтигэр тахсар уларыйыылары ырытыһар, бэйэлэрин санааларын атастаһар сирдэрэ этэ. Манна Россия культуратыгар «Үрүҥ көмүс үйэ» диэн ааттанар бэлиэ кэм биллиилээх дьоно: Анна Ахматова, Алексей Толстой, Максим Горькай, Владимир Маяковскай, Константин Станиславскай, Владимир Немирович-Данченко уо.д.а. өрүү сылдьар, ыалдьыттыыр этилэр.
В.В. Никифоров-Күлүмнүүр арт-кулуупка мустубут дьоҥҥо «Манчаары» диэн бэйэтин драматын нууччалыы ааҕан иһитиннэрбитэ. Россия литературатын, искусствотын, култууратын бастыҥ бэрэстэбиитэллэрэ саха бастакы драматическай айымньытын кэрэхсээбиттэрэ, сэргээбиттэрэ. Ол туоһутунан «Русские ведомости» хаһыакка Россия биллиилээх учуонайа уонна литератора В. Богораз-Тан биһирэбиллээх рецензията буолбута.
Бу бэлиэ түгэни кэриэстээн Александр Жирков этии киллэриитинэн 2016 с. саха бастакы интеллигенциятын чулуу киһитэ - В.В. Никифоров-Күлүмнүүр мэтириэтэ арт-кулуупка сылдьыбыт улуу дьон мэтириэттэрин галереятыгар биир кэккэҕэ туруорбуттара.
Ил Түмэн бастакы вице-спикерын бу сырыыга Санкт-Петербурга Российскай Федерация Президенин иһинэн Саха Республикатын бастайааннай бэрэстэбиитэлин солбуйааччы Юрий Кравцов арыаллаата.
-
0
-
0
-
0
-
0
-
0
-
0
