Саха Өрөспүүбүлүкэтин физическэй култуураҕа уонна успуорка миниистирэ Леонид Спиридонов, Физическэй култуура уонна успуорт Чурапчытааҕы судаарыстыбаннай институтун ректора Иннокентий Готовцев, СӨ тутуутун миниистирин солбуйааччыта Евгений Афанасьев, Саха Өрөспүүбүлүкэтин үбүн миниистирин солбуйааччыта Гаврил Алексеев, Чурапчы улууһун баһылыга Степан Саргыдаев, «Энерджи» ХЭТ техническэй дириэктэрэ Иван Бурнашев, СӨ Экэниэмикэтин министиэристибэтин федеральнай бырагыраамалары уонна госкапвложениелары кытта үлэҕэ департаменын салайааччытын солбуйааччыта Иннокентий Петров дьүүллэһиигэ кытыннылар.
Михаил Гуляев иһитиннэрбитинэн, быйыл Дмитрий Петрович Коркин төрөөбүтэ 95 сылыгар сөп түбэһиннэрэн хамыыһыйа тэриллибитэ. «СӨ Бырабыыталыстыбатын Бэрэссэдээтэлэ Андрей Тарасенко онно бэрэссэдээтэлинэн анаммыта. Кини Д.П. Коркин аатынан Чурапчытааҕы спортивнай оскуола тутуутун бырайыагар харчы бэриллэн баран, ол оҥоһуллубакка турарын бэлиэтээн туран, эппиэтинэстээх үлэһиттэри кытта мунньах ыытарга уонна быһаарыыта ылан баран киниэхэ тиэрдэргэ соруйбута. Бу бырайыагы быйыл оҥорон бүтэрэн, 2025-26 сыллааҕы бырагыраамаҕа киллэриэхпитин сөп. Оччоҕо Дмитрий Петрович 100 сылыгар интэринээт уонна спортивнай комплекс тутуллан бүтүөхтээх. Бырайыак 95%-а федеральнай, 5%-а өрөспүүбүлүкэттэн үбүлээһиннээх этэ. Билигин бырайыагы үчүгэйдик оҥорууга түргэтиэххэ наада», – диэн быһаарда сис кэмитиэт бэрэссэдээтэлэ.
Ол кэннэ Михаил Гуляев Чурапчыга баар спортивнай эбийиэктэр хайдах тутуллубуттарын туһунан кэпсээтэ: «Дмитрий Коркин 1976 сыллаахха Монреальга буолбут Олимпийскай оонньууларга улахан кыайыыны ситиспитэ. 1985 сыллаахха Коркин кыайыытыгар олоҕуран спортивнай оскуолаҕа улахан саала тутан киллэрбиттэрэ. Оччотооҕуга тыа сиригэр бастакы таас дьиэ этэ. 1990 сыллаахха ССРС Миниистирдэрин сэбиэтин иһинэн физическэй култуураҕа уонна успуорка кэмитиэтин солбуйар бэрэссэдээтэлигэр Анатолий Колесовка манеж тутуутун туруорсан 400 тыһ. солкуобайы ылбыппыт. Сотору буолаат Сойуус эстибитэ. Онтон манеж тутуллан киирэрин 1996 сылга эрэ ситиспиппит».
Физическэй култуура уонна успуорт Чурапчытааҕы судаарыстыбаннай институтун ректора Иннокентий Готовцев Дмитрий Коркин 95 сылынан сибээстээн боротокуолга киирбит эбийиэк тутуллуута барыта былырыын тохтоон хаалбытын эттэ. «Ол иһин эһиилгиттэн тутууну саҕалаан Коркин 100 сылыгар дылы ити эбийиэктэри тутан бүтэрэр сыаллаах СӨ успуордун министиэристибэтэ Россия успуордун министиэристибэтиттэн харчы ыларга үлэлэһиэхтээхпит», – диэтэ институт ректора.
Саха Өрөспүүбүлүкэтин тутуутун миниистирин солбуйааччыта Евгений Афанасьев Дмитрий Петрович Коркин 95 сылыгар анаан тутуллуохтаах эбийиэктэри министиэристибэ өйүүрүн биллэрдэ. «Кини бырайыактааһыҥҥа харчы көрүллэн турарын бэлиэтээтэ. Саҕалааһын баар буоллаҕына, эбийиэги инникитин үбүлүүргэ төһүү күүс баар буолуоҕа. Саҥа эбийиэк тутуутугар үлэлэһиэхпит», – диэн эттэ миниистир солбуйааччыта.
СӨ үбүн миниистирин солбуйааччыта Гаврил Алексеев билиҥҥи туругунан бырайыак нуормаҕа эппиэттээбэтин иһин уларытыллыахтааҕын, ол кэннэ экспертизаны ааһаан баран тутуу салҕаныахтааҕын бэлиэтээн эттэ.
Түмүккэ Михаил Гуляев бырайыагы чопчулааһын үлэтигэр ситиһиини баҕаран туран, кэлэр нэдиэлэҕэ өрөспүүбүлүкэ экэниэмикэтин министиэристибэтигэр бэлэм боротокуолу ситэрэргэ-хоторорго сорудах биэрдэ.
-
0
-
0
-
0
-
0
-
0
-
0
