Спорт

Бу тэрийбит федерациябыт үлэтин түмүгэр Ытык Күөлгэ, Дьохсоҕоҥҥо, Дэбдиргэҕэ, Даайа Амматыгар, Чөркөөххө, Харбалаахха, Чычымахха хамнастаах тренердэр оскуола, СПТУ оҕолорун боксаҕа эрчийэр буолбуттара. Онон өрөспүүбүлүкэҕэ Тааттаҕа бокс баар диэн билиммиттэрэ.

Хомойуох иһин, билигин улууска 1 эрэ тренер Бысыин Николай Николаевич, Дьохсоҕоҥҥо олорон, Ытык Күөлгэ оҕолору эрчийэр. Кини уол оҕо уйулҕатын үчүгэйдик билэр, бэйэтэ туспа методикалаах үрдүк таһымнаах тренер. Нууччаҕа өс хоһооно баар «Один на поле не воин» диэн, оттон бу өс хоһооно киниэхэ сөп түбэспэт. Ону биир маннык холобуртан көрүөххэ сөп.

Бу дьыл тохсунньу 30 күнүгэр Саха Сиригэр бокс тэриллибитэ 80 сылынан Дьокуускай куорат аҕа баһылыга, өрөспүүбүлүкэҕэ бокса федерациятын салайааччытын солбуйааччы Евгений Николаевич Григорьев республика саамай бастыҥ, инникилээх боксердарыгар спортивнай формалары туттартаата.

Форманы Александр Максимов салайааччылаах “Таҥас” диэн олохтоох тэрилтэ тикпит. Эдэр уолаттартан 5 уол форманы ылар чиэскэ тигистэ. Бу 5 уолтан иккитэ Антон Сивцев, Борис Габышев - таатталар. Онон республика 5 бастыҥ боксеруттан иккитэ Таатта буолбута бу үчүгэй көрдөрүү дии саныыбын.

Аны форма ылбыт 5 уолтан спорт маастара Никита Малгин эмиэ Таатта. Ол гынан баран, кини куорат ДЮСШ дьарыктаммыта. Кини бокс баар улууһуттан кэллэҕэ дии, эйгэ сабыдыала диэн баар. Онон Тааттаттан 3 бастыҥ боксер форма ылла диэхпитин сөп.

Хаартыскаҕа уҥаттан 2-с Никита Малгин, 3-с Борис Габышев, 5-с Антон Сивцев.

Дьэ, бу өрөспүүбүлүкэҕэ  үчүгэй көрдөрүүлээх бокс секцията көрдөбүлгэ эппиэттиир эрчиллэр саалата суох. Өрөспүүбүлүкэҕэ  бокс оскуолатын урукку дириэктэрэ Максим Аммосович Куприяновтан (билигин дириэктэр Бурцев Константин Семенович) эбии штат туруорса сатаабыппыт даҕаны, кини: "Грушалар куруук ыйанан турар көрдөбүлгэ эппиэттиир саалалаах буоллаххытына эрэ биэрэбин", - диир этэ.

Бокс, күөн күрэс көрүҥэ буоларынан, патриот буолууну кытары ыкса сибээстээх. Рингэҕэ киирсэн, кыра дуу, улахан дуу эчэйиини ылбыт, нэһилиэгин, улууһун, республикатын чиэһин көмүскээбит оҕо улааттаҕына дойдутун таптыыр, дойдутун көмүскүүргэ бэлэм буолар. Таатта улууһугар боксаҕа эрчиллибит уолаттар аармыйаҕа дьон тэҥинэн, дьонтон атаҕастаммакка сулууспалаан кэлбиттэрэ. Билигин анал байыаннай дьайыы буола турар кэмигэр үгүс уолбут дойдуларын көмүскүү сылдьаллар. Олортон сорохторун ахтан ааһарар буоллахха, Жирков Ньургун, Жараев Семен, Зарипов Ньургун, Жирков Гоша, Егоров Янсон СВО-ҕа сылдьаллар. Янсон штурмовой этэрээккэ сылдьан, атаҕар бааһырбыта. Тренербит Александр Афанасьевич Павлов фронт инники кирбиитигэр баар. Билиҥҥи Интернет үйэтигэр кинилэр хайдах сэриилэһэ сылдьалларын истэ-билэ олоробут.

Уолаттарбыт саха боотурдара бары кырыктаах кыргыһыыларга кылыстарын умсары туппаттар, хорсуннук сэриилэһэ сылдьаллар. Улууспут аҕа баһылыга Айаал Семенович Бурцев оскуолаҕа сылдьа, Ытык Күөлгэ боксаҕа Семен Мончуриҥҥа эрчиллибитэ. Кини баҕа өттүнэн СВО-ҕа ийэ дойдутун көмүскүү барбыта. 

Быйыл Тааттаҕа Манчаары оонньуулара буолалларынан, Ытык Күөлгэ элбэх хайысхалаах чэбдигирдэр-спортивнай комплекс тутулла турар. Онон сибээстээн улуус боксердара, боксаны сэҥээрээччилэрэ улуус салалтатыттан боксаҕа сөптөөх усулуобуйаны тэрийэллэригэр уонна биир дойдулаахпыт, өрөспүүбүлүкэҕэ  боксаны төрүттээбит, сахалартан бастакынан Саха Өрөспүүбүлүкэтин уонна Арассыыйа үтүөлээх тренерэ ааты ылбыт Арсен Петров аатын спорт уораҕайыгар иҥэрэргитигэр көрдөһөбүт.

Боксанан дьарыктаммыт улууспут баһылыга Айаал Семенович уонна улуус баһылыгын эбээһинэһин толорооччу Руслан Игнатьевич Захаров бу этиибитин үөрэтэн көрүөхтэрэ диэн эрэнэбит.

Таатта улууһугар бокса федерациятын тэрийээччи, федерация бастакы салайааччыта Иван Гарильевич Неустроев.