Биһигини спорт эйгэтэ билиһиннэрбитэ. 2000 сыллаахха сайын Покровскай куоракка Саха Сирин норуоттарын иккис спортивнай оонньууларыгар мини-футболга күрэхтэһэ тиийбитим. Ол кэмҥэ футболга Европа түһүлгэтэ буола турара. Бэчээт дьиэтигэр түүннэри оонньуулары көрүү -- ыалдьааһын, уксуу, ыһыы-хаһыы... Ол быыһыгар биир кыра уҥуохтаах, хатыҥыр уолу кытта билистим: «Петр Павлов диэммин, “Дьулурҕан” хаһыат”, - диэтэ. Киһим тэтэрээттээх, онтукатыгар чемпионат таблицата, оонньуулар ахсааннара, ким хаһыс мүнүүтэҕэ гол киллэрбитэ уо.д.а. бэрт үчүгэй буочарынан суруллубут эбит. Ону олус сөҕө көрдүм, туох ураты киһитэй диэн санаабытым.
Ол күһүнүгэр “Спортивная Якутия” хаһыакка үлэлии киирбитим. Ол онтон ыла Бүөккэни кытта элбэхтик көрсөр, кэпсэтэр, санаа атастаһар буолбуппут. Кинини кытта “Дьулурҕаҥҥа” Геннадий Бечеряков (аатырбыт «Дуораан” бөлөх бас-гитариһа) уонна ытыктабыллаах Степан Юмшанов үлэлииллэрэ. Степан Иннокентьевич бэрт элбэх кэпсээннээх, бэтиэхэлээх киһи этэ. Мин кини курдук Дьааҥы улууһугар Боруулаах орто оскуолатыгар дириэктэринэн үлэлээбиппин билэн, астынара, бэрт түргэнник уопсай тылы булбуппут. Биирдэ тустуу күрэхтэһиитигэр улууска айаннаатыбыт. Ол баран иһэн киһим этэр: Мин материалбын туттардым. -- диир. Ону сөҕө иһиттим уонна ыйыттым: Ол аата хайдах? Күрэхтэһии саҕалана да илик дии, -- диэтим. Ону баара кырдьаҕас барыан иннинээҕи күн барытын машинисткаҕа бэчээттэтэн бэлэмниир эбит. Нэдиэлэ саҕаланыытыгар үлэтигэр кэлэн, хайыы үйэ таҥыллыбыт балаһаҕа бөҕөстөр ааттарын эрэ суруйан биэрэрэ. Онон бүтэр.
Спортивнай суруналыыстар түмсүүлэрин тэрийэн, бэрт сэргэхтик үлэлэппиппит. Ол курдук, Степан Алексеев салайааччылаах «Sport House» кулуупка алтынньы ыйга бастакы түмсүүбүтүҥ олус бэрткэ ыыппыппыт. Кэлин Хаҥалас улууһугар, Афанасий Владимиров ыҥырыытынан бара сылдьыбыппыт.
2002 сыллаахха саас көҥүл тустууга Николай Тарскай аатынан чемпионат Майаҕа ыытыллыбыта. Ол сылдьан, Саха Сирин устуоруйатыгар бэйэтин аатын-суолун хаалларбыт, саха чулуута Иннокентий Тихонович Васильев (норуот таптаан И.Баһылайап диэн ааттыыра) спорт туһунан муспут сэдэх экспонаттарын, хаартыскаларын, кини спорт сайдыытыгар улахан өҥөтүн туһунан кэпсэппиппитин өйдүүбүн.
Эһиилигэр Красноярскай куоракка Иван Ярыгин кэриэһигэр ыытыллар турнирга сылдьыбыппыт. Ол сыл күрэхтэһии тоҕо эрэ сайын, от ыйыгар ыытыллыбыта. Аатырбыт генерал Александр Лебеди кытта алтыспыппыт, хаартыскаҕа түспүппүт. Кэлин Кыһыл Дьаар куоратыгар Ньургун Скрябин өрөгөйдөөх кыайыытын илэ харахпытынан көрбүппүт.
2016 сыллаахха Петр Семенович олоҕун тухары муспут, оҥорбут “Покорившие Олимп” үһүс кинигэтэ күн сирин көрөрүгэр үбүнэн көмөлүспүтүм. Бу маннык ураты кинигэ бэрт сэдэх көстүү буолар. Мин санаабар, Петр Семенович бу үлэтэ салалта өттүттэн сөптөөхтүк сыаналаммакка сылдьар. Аны тиһигин быспакка, үйэ чиэппэрин тухары сахалыы тыллаах спорт туһунан “Дьулурҕан” хаһыаты дьаныардаахтык таһаарар. Ону аһары баран, куйаар ситимигэр итинник ааттаах Ютубка уонна Телеграмҥа ханааллары арыйан, олору күн ахсын сонуннарынан толоруу элбэх үлэттэн-сыраттан тахсар.
Бу олоҕун бүс бүтүннүү успуортка анаабыт үлэтэ Д. П. Коркин аатынан Судаарыстыбыннай бириэмийэҕэ толору сөп түбэһэр. Петр Семенович курдук үйэ аҥаарын кэриҥэ тустуу туһугар оҥорбут үтүөлээх киһи, мин санаабар, бу Орто дойдуга суох. Онон “Сахабэчээт” салалтата бу маны туруорсан тиһэҕэр тириэрдэ буоллар, үтүө дьыаланы оҥоруо этигит. Киһи үлэтэ-хамнаһа үлэлии сылдьар кэмигэр сыаналаныахтаах. Уонна маннык сэдэх киһини, саха чулуу уоланын Петр Павловы харыстыахха, бүөбэйдиэххэ, ытыс үрдүгэр илдьэ сылдьыахха!
Родион КРИВОГОРНИЦЫН,
«Спортивная Якутия» (2002-2005), «Саха сирэ» (2018-2021) хаһыаттар сүрүн редактора
-
2
-
0
-
0
-
0
-
0
-
0
