Биһиэхэ Арассыыйа, Европа, Аан дойду уонна Олимпиада чөмпүйүөннэрэ уонна призердара тыһыынчанан оҕоҕо уонна ыччакка холобур буолаллар. Ол эрээри, улахан спорт маассабай спорда суох үөскээбэт. Мин санаабар, баар таһымҥа сөп түбэһэр гына, маассабай спорт уонна физическэй култуура сайдарыгар дьаныардаах дьарык туһунан билии ирдэнэр.
Манна даҕатан эттэххэ, биһиэхэ спортивнай таһаарыы булгуччу баар буолуохтаах. Онно физическэй култууранан дьарыктаныы ньымаларын, спортивнай билим ситиһиилэрин, саҥа методикалары уонна технологиялары билиһиннэрии наада. Спорт суруналыыстыката муҥура суох киэҥ хайысха. Маннык таһаарыыны үбүн-харчытын бюджеттан быһааран тэрийэр наада. Ону таһынан, үөрэх тэрилтэтигэр спорт суруналыыстыкатыгар каадырдары бэлэмниир тоҕоостоох. Саха Сиригэр элбэх спортивнай күрэхтэһиилэр буолаллар, хас биирдии спорт көрүҥэр бу спорду билэр киһи суруйара, сырдатара бэрт этэ.
Сайдыыга сөптөөх спорт политиката информацияттан саҕаланар. Дьоҥҥо тарҕанар информация көмөтүнэн оҕолору уонна эдэрдэри спордунан дьарыктаныыга тардыахха сөп. Спорт - бу рекорд эрэ буолбакка, сүрүнэ доруобуйа, дисциплина уонна бэйэҕэ итэҕэл. Спорт суруналыыстыкатын сайыннарыы - дьоҥҥо чөл турук сыаннастарыгар болҕомтону ууруу, оннук киһи таһаарыылаахтык үлэлиир да буоллаҕа, спорт эйгэтигэр саҥа билиини тарҕатыы уонна физическэй култуураҕа интэриэһи уһугуннарыы буолар. Дьон чөл туруктаах буолуута экономикаҕа кытта улахан туһалаах.
Мин спорт эйгэтигэр үлэлии сылдьыбыт кэмнэрдээхпин. Оччолорго спорт суруналыыстарын кытары ыкса үлэлэһэр этим. Мин өйдүүрүм - норуот спордунан дьарыктаныытын уһугуннарарга ыытар политикаҥ спорт суруналыыстарын эрэ нөҥүө үлэлээтэххэ дьоҥҥо тиийимтиэ буоларын. Спорт суруналыыстара былаас спорт эйгэтигэр туох политиканы ыытарын сурах хоту буолбакка, спорт миниистирин кытта ыкса үлэлиир эрэ буоллахтарына, дьоҥҥо туһалаах уонна спорт эйгэтигэр халбарыйбат хамсааһыннары таһаарыахтарын сөп. Онон спорт эйгэтигэр спорт суруналыыстарын кытта сэргэх үлэлэри өссө күүскэ сайыннарыахха.
Константин БОРИСОВ,
СӨ ыччат политикатыгар, спортка уонна физическэй култуураҕа 2000-2003 сс. миниистирэ,
СӨ норуотун хаһаайыстыбатын үтүөлээх үлэһитэ, экономическэй билим кандидата
-
2
-
0
-
0
-
0
-
0
-
0
