Футболиһы Дьокуускайдааҕы аэропортан саҕалаан үгүс киһи тоҕуоруһа көрсөн, ааспыт күнү мэлдьи успуорту тэрийээччилэр, футболу таптааччылар болҕомтолорун киинигэр сырытта.
Биллэрин курдук, сүрүн тэрээһин «Туймаада» стадиоҥҥа буолла. Манна футбол сулуһа кыттыылаах медиа-матч сыалын-соругун ситистэ - барыларын да сэргэхситтэ. Биир өртүттэн киирбит Саха Өрөспүүбүлүкэтин физичэскэй култуураҕа уонна успуорка миниистирэ Леонид Спиридонов хапытааннаах хамаанда күүстээх киирсиини көрдөрдө.
Оттон биллиилээх ыалдьыппыт Аршавин хамаандатыгар Саха Сирин футболу кыраҕатык кэтээн көрөөччүлэригэр биллэр футболистар оонньоотулар. Уопсайынан хамаандаларга- иккиэннэригэр медиа үлэһиттэрэ, блогердар, ырыаһыттар, артыыстар, ыытааччылар, урбаанньыттар, күрэхчиттэр уо.д.а хото кытыннылар.
Аршавин хамаандатыгар кыттыбыт Дьокуускайдааҕы «Заряҕа» өр кэмҥэ оонньообут Афанасий Федоров мини-футболист быһыытынан бастакы 2 голу киилэрдэ. Салгыы биллиилээх ыалдьыппыт бэйэтин голунан счету 3:0 оҥордо.
Онтон олохтоох хамаанда хаалсыбакка, Леонид Спиридонов бэйэтинэн хет-трек киллэрэн үөртэ. Ону кытта ырыаһыппыт Ариан Свинобоев футболист кылааһын бу сырыыга да бигэргэттэ. Салгыы хасаҕайдьыт Владислав Лепчиков, Дыгын оонньууларыттан Артем Варданян уонна медиа-матчка оонньуур кыаҕы биэрэр дьоллоох билиэти сүүйбүт Анатолий Семенов киллэртээтилэр. Атыттар эмиэ голлаатылар.
Онон футбол классикатын тутуһан, оонньуу сүрүн бириэмэтигэр ахсаан тэҥнэһэн - 8:8 буолан, кыайыылааҕы пенальтинан быһаардылар. Манна арааһа бэйэбит истиэнэбит көмөлөстөҕө - олохтоох хамаанда кыайыылаах таҕыста.
Хаартыскалар Дьулустаан Сергеев, ЯСИА
-
2
-
0
-
0
-
0
-
0
-
0
