«Оскуолаҕа үөрэнэр кэмнэрбэр «Домоводство» диэн бирэдимиэти наһаа үчүгэй Вера Дмитриевна Крылова диэн учуутал үөрэппитэ. Онно кини таҥас кырыйарга, киэп оҥорорго, ас астыырга, быысапкалыыр-тигэр араас сииктэригэр үөрэппитэ. Бу барыта билигин да олохпор туһалыы сылдьар диэн учууталбар махталым муҥура суох», - диэн Марина Прибылых дириҥ махталынан ахтар-саныыр.
«Оскуолаҕа үөрэнэр кэмнэрбэр «Домоводство» диэн бирэдимиэти наһаа үчүгэй Вера Дмитриевна Крылова диэн учуутал үөрэппитэ. Онно кини таҥас кырыйарга, киэп оҥорорго, ас астыырга, быысапкалыыр-тигэр араас сииктэригэр үөрэппитэ. Бу барыта билигин да олохпор туһалыы сылдьар диэн учууталбар махталым муҥура суох», - диэн Марина Прибылых дириҥ махталынан ахтар-саныыр.
Тарбаҕар талааннаах Далбар Хотун дьиэтин түбүгүттэн быыс буллар эрэ, иис арааһын иистэнэр. Сиэнигэр сахалыы илин-кэлин кэбиһэри оҕуруонан тикпитэ. Оҕо дэйбиирдэрин, саламалары оҥортуур. Сыалыһар балык тириититтэн суумка, сүөһү хабаҕыттан араастаан быысапкалаан суумкалары, «ковровай» тиэхиникэнэн гобелен оҥоһуктары оҥортоон, култуура уонна спорт эстэпиэтэтигэр көхтөөхтүк кыттар. Кэнники сылларга дьулуһан туран, быысапкалаан "Саха дьахтара", "Индия ийэтэ, нуучча дьахтара оҕолорунаан", "Негр дьахтара" диэн күн-күбэй ийэлэри дьүһүйэн оҥортообут үлэлэрэ киһини сөхтөрөллөр. Билигин гобелен-ковровай тиэхиникэнэн биир үлэни оҥоро сылдьар.
Эдэр эрдэҕиттэн былаат, оҕуруо (бусы), значок, таастан оҥоһуллубут тимэхтэри, сүүтүктэри, 50-с сыллардааҕы былыргы курдары мунньубут коллекциятынан эмиэ араас көрүүлэргэ кыттыыны ылар. Ити курдук, сөбүлүүр дьарыгынан ииһинэн-быысапканан дьарыктанан, онтон дуоһуйууну ылан сааһырыыга ылларбакка олорорго дьулуһар, биһиги биир дойдулаахпыт - Марина Прибылых.
Прибылых-Охлопкова Марина Семёновна 1949 сыллаахха Уус Алдан оройуонугар Суотту бөһүөлэгэр колхуостаах дьиэ-кэргэнигэр күн сирин көрбүтэ.1968 сыллаахха Мэҥэ Хаҥаласка Төхтүр оскуолатын бүтэрэн Лоомтукаҕа педкылааһы бүтэрэн, 1969 сыллаахха Балыктаах бөһүөлэгэр оҕо уһуйааныгар иитээччинэн ананан үлэтин саҕалаабыта.
1978 сыллаахха педучилищены кэтэхтэн үөрэнэн бүтэрбитэ. Үгүс сылларга баспытааталынан дьаныардаахтык үлэлээн, элбэх көлүөнэ оскуола иннинээҕи саастаах оҕолору иитиспитэ.1970 сыллаахха олоҕун доҕорун Прибылых Гаврил Васильевиһы көрсөн, ыал буолан, түөрт оҕону төрөтөн-үөрэттэрэн, барыларын ыал оҥортоон, билигин элбэх сиэн, хос сиэн эйэҕэс эбэлэрэ буолан олоҕо салҕанар. 1999 сыллаахха биэнсийэҕэ тахсан олоруоҕуттан, ииһинэн дьарыктанар.