Үгэс курдук, тыа сиригэр олохтоохтору улуус дьаһалтатын отчуота интэриэһиргэтэр, тоҕо диэтэргит, нэһилиэк таһымынааҕы олохтоох дьаһалта дьонун-соргэтин кытта күннэтэ көрсөн, алтыһан, үлэлэһэ сылдьарынан, барыта да ытыска уурбут курдук көстөн турдаҕа. Онтон аны олунньу 3 күнүттэн улуустарга, нэһилиэктэргэ Саха Өрөспүүбүлүкэтин бырабыыталыстыбатын отчуота саҕаланыаҕа.
Бу таһаарыыга Бүлүү улууһун өрүс уҥуоргунааҕы нэһилиэктэргэ улуус дьаһалтатын очтуотун туһунан «Олох суола» хаһыат кэрэспэдьиэнэ Николай Куприянов Улусмедиаҕа матырыйаалыттан билсиэҕиҥ.
II Күүлэт олохтооҕо Иван Федотов: Отчуокка аһаҕас кэпсэтии таҕыста
Улуус дьаһалтатын ааспыт сыллааҕы үлэтин отчуотун туруорар улуус баһылыгын бастакы солбуйааччы Иван Евсеев салайааччылаах иккис бөлөх тохсунньу 22 күнүгэр II Күүлэт нэһилиэгин олохтоохторун кытта көрүстэ.
Отчуоту туруорар мунньахха туох кэпсэтии тахсыбытын туһунан II Күүлэт олохтооҕо Иван Федотов санаатын үллэһиннэ:
— Отчуоту туруорар мунньахха кэпсэтии тыа хаһаайыстыбатын боппуруостарын тула барда. Биллэрин курдук, быйылгыттан үүтү туттарыыга, сүөһү төбөтүгэр үбү биэриини улуус бэйэтэ быһаарар буолар. Олохтоохтор мунньахха эппиттэрин курдук, санааларын ынах төбөтүгэр көрүллэр харчыга уураллар. Ити төрүөтүнэн арыы сыаҕа кылгас кэмҥэ – үс эрэ ыйга үлэлиирэ буолар. Дьон ити эрэ кэмҥэ үүт туттаран харчы аахсар кыахтаах.
Биһиги арыы сыаҕа кырата 6 ый үлэлиирин туруорсабыт. Дьиэтэ сылаас, оборудованиета, үлэһит хамнаһа баар буолуохтаах, оччоҕуна дьон үөрүүнэн үүт туттарыа этэ.
Ааспыт сылга биһиэхэ ууну түһэриигэ улуус көмөтүнэн мелиорация тэрилтэтэ үчүгэйдик үлэлээтэ. Мунньахха быйыл ууну түһэрии салҕаныа диэн этиллибитин дьон сэргии иһиттэ.
Тыа хаһаайыстыбатыгар урбаан быһыытынан киирсэн үлэлиири дьон өйдөөн олорор. Мунньахха бэйэ дьарыктаах буолуу (самозанятай) туһунан кэпсэтии эмиэ таҕыста. Холобура, II Күүлэккэ 50 т эт оҥоһуллар, арыы сыаҕа уһуннук үлэлээтэҕинэ элбэх үүт туттарыллан арыы оҥоһуллуо этэ. Бэйэ дьарыктаах киһи этин-үүтүн, арыытын батарар кэмэ кэллэ.
Мунньахха улуус баһылыгын бастакы солбуйааччы Иван Евсеев, тыа хаһаайыстыбатын департаменын сүрүннүүр исписэлииһэ, улуус зоотехнига Эдуард Михайлов дьоҥҥо-сэргэҕэ элбэх боппуруостары быһааран-өйдөтөн биэрдилэр.
Тылгыны олохтооҕо Анна Васильева: Отчуот туһалаахтык ааста
Улуус дьаһалтатын ааспыт сыллааҕы үлэтин отчуотун туруорар улуус баһылыгын бастакы солбуйааччы Иван Евсеев салайааччылаах иккис бөлөх тохсунньу 21 күнүгэр Тылгыны нэһилиэгин олохтоохторун кытта көрүстэ.
Отчуот хайдах ааспытын туһунан Тылгыны олохтооҕо Анна Васильева санаатын үллэстэр:
— Улуус дьаһалтатын отчуота туһалаахтык ааста. Тоҕо диэтэххэ, Иван Евсеев улуус ааспыт сыллааҕы олоҕун бары салааларыгар тахсыбыт уларыйыылары кылгас-кылгастык кэпсээн билиһиннэрдэ. Дьокутааттар оройуоннааҕы Сэбиэттэрин бэрэссэдээтэлэ Гаврил Корякин КлиКра сокуонун барылын туһунан чуолкай өйдөбүл биэрдэ, сиһилии кэпсээтэ. Ил Түмэн депутата Егор Григорьев балыыһа тутуута ханнык түһүмэххэ тиийбитин, лаборатория арыллыаҕын эттэ.
Дьон ордук сүөһү иитиитигэр, ынах сүөһү төбөтүгэр субсидия ылыыны, үүт туттарыытыгар кэпсэттилэр.
Олохтоохтор бэйэлэрэ интэриэһиргиир боппуруостарын ыйыттылар, санааларын хото этиннилэр.
Үгүлээт олохтооҕо Байрон Иванов: Ааспыт 2024 сылга улуус салалтата элбэх үлэни ыытта
Улуус дьаһалтатын ааспыт сыллааҕы үлэтин отчуотун туруорар улуус баһылыгын бастакы солбуйааччы Иван Евсеев салайааччылаах иккис бөлөх тохсунньу 21 күнүгэр ыраах, тэйиччи сытар Үгүлээт нэһилиэгин олохтоохторун кытта көрүстэ.
Үгүлээт нэһилиэгин олохтооҕо Байрон Иванов отчуот хайдах ааспытын туһунан санаатын үллэһиннэ:
— Улуус салалтатын 2024 сыллааҕы үлэтин отчуоттуур мунньаҕа, мин санаабар, үчүгэйдик ааста. Дьон да элбэх кытынна, хаһааҥҥытааҕар да элбэх ыйытык киирдэ, сөптөөх эппиэттэр бэрилиннилэр.
Отчуоту туруорар да бөлөх састааба таһымнаах, холобура, дьокутааттар оройуоннааҕы Сэбиэттэрин бэрэссэдээтэлэ Гаврил Корякин, Ил Түмэн депутата, оройуоннааҕы балыыһа кылаабынай бырааһа Егор Григорьев, дьаһалта управлениеларын тутаах үлэһиттэрэ дьон санаатын иһиттилэр, элбэх ыйытыкка хоруйдаатылар.
Гаврил Корякин олохтоох бэйэни салайыныыга киириэхтээх КлиКра сокуонун барылын, муниципальнай уокуругунан дуу, түөлбэнэн дуу барыыны үчүгэй баҕайытык быһааран биэрдэ. Улуустааҕы баай-дуол, сир сыһыаннаһыыларыгар кэмитиэт салайааччытын солбуйааччы Артем Иванов быйыл Үгүлээккэ ыытыллыахтаах Кадастр кэлим үлэтин туһунан дьоҥҥо-сэргэҕэ билиһиннэрдэ.
Ил Түмэн дьокутаата Егор Григорьев кэпсээбитинэн, сотору кэминэн балыыһабытыгар саҥа массыына, лабораторияҕа оборудование кэлиэхтээҕэ олохтоохтору үөрдэр.
Отчуоттуур бөлөх салайааччыта Иван Евсеев тыа хаһаайыстыбатыгар улууска бэриллибит боломуочуйанан субсидия үбүн аттарыыга өйдөнүмтүө быһаарыы оҥордо.
Отчуоттуур мунньахха элбэҕи иһиттибит-биллибит, мин санаабар, улуус салалтата ааспыт сылга үчүгэйдик үлэлээтэ, Үгүлээккэ элбэх көмө оҥоһуллубутун бэлиэтиэххэ сөп. Ааспыт отчуокка туруорсубут боппуруостарбытыттан сороҕо туолбата гынан баран, саха ынаҕын аҕалтардылар.
Инникитин да, мин санаабар, ыраах сытар Үгүлээккэ улуус өттүттэн күүс-көмө баар буолуо.
Хаартыска: Улусмедиа
-
0
-
0
-
0
-
0
-
0
-
0
