Кэлбитим, Елизаветам барахсан олохтоох дьону-сэргэни номнуо ыкса билсэн, үлэ үөһүгэр сылдьара. Иллэҥ кэмигэр ордук сөбүлээн ардыгар Колодезников Иннокентий Николаевичтаахха кэргэнэ Ульяна Прокопьевналаахха сылдьара, солуну, сураҕы-садьыгы ирэ-хоро сэһэргэһэллэрэ.
Колодезниковтар бу уһук хоту сир дьоһуннаах түөлбэтигэр улаханнык ытыктанар ыаллар. Бэйэлэрин кэмнэригэр сэбиэскэй саҕаттан эдэрдэриттэн үлэни, кыһалҕаны ааспыт дьон. Ол курдук, кинилэр 1970 сыллаахха олохтоох сельскэй сэбиэккэ саахсаламмыттар. Инникентий Николаевич ол кэмҥэ 25 саастаах, кэргэнэ Ульяна Прокопьевна 23 саастаах эбиттэр. Оскуолаҕа биир кэмҥэ үөрэммиттэр, оҕо эрдэхтэриттэн доҕордоһоллоро. Сайыҥҥы кэмҥэ балыктыыр учаастактарга биир биригээдэҕэ иккиэн бииргэ сылдьан балыктаан, айылҕа барахсаҥҥа үөрэ-көтө үлэлээн, сынньанан кэлэллэр эбит. Ыал буолбуттарын кэннэ Ульяна Прокопьевна 1971 сыллаахха оҕоломмут, уолларын Прокопий диэн эһэтин аатынан ааттаабыттар, 1983 сыллаахха кыыстара Оля төрөөбүт, киниэхэ эбэтин аатын биэрбиттэр.
Дьиэ хаһаайына Иннокентий Николаевич 1946 сыллаахха Тиксии бөһүөлэгэр төрөөбүт. 1963 сыллаахха «Арктика» балык холкуоһугар механизаторынан ананан үлэтин саҕалаабыт. Мантан ыла кини хотугу тыйыс килиимэттээх, уустук усулуобуйалаах сиргэ 50 сыл устата тиһигин быспакка механизаторынан, вездеходка профессиональнай таһымнаах суоппарынан үлэлээбит. Кини нэһилиэгэр гусеницанан барар вездеходунан суола суох туундаранан, мууһунан бүрүллүбүт аата-ахсаан биллибэт элбэх күөллэринэн, үрэхтэринэн, өрүһүнэн, муоранан түүннэри-күнүстэри балыксыттары, оҕолонор дьахталлары Тиксиигэ тиийэ тиэрдитэлиирэ. Оччолортон үлэтигэр олус бэриниилээх диэн эдэр киһиэхэ эрэнэллэрэ. Чиэһинэй, толоругас, дьиссипилиинэлээх буолан салайааччыларга, дьонугар-сэргэтигэр дириҥник ытыктаммыта. Кини Быыкап олохтоох сэбиэтигэр хаста да дьокутаатынан быыбардаммыта. Өр сыллаах эҥкилэ суох үлэтин иһин 1972 сыллаахха Саха АССР профсойууһун уобаластааҕы кэмитиэтин бочуоттаах «Социолистическай күрэхтэһии кыайыылааҕа» диэн үрдүк ааты, иккиһин 1974 сыллаахха ылбыта. 1971 сыллаахха РСФСР Балыктааһыҥҥа хаһаайыстыбатын министиэристибэтин Бочуотунай грамотатынан наҕараадаламмыта. «Арктика» холкуос бырабылыанньатын Махтал суругунан, грамотатынан бэлиэтэммитэ. Ити кэннэ 2020 сыллаахха «Саха Өрөспүүбүлүкэтин тыатын хаһаайыстыбатын туйгуна», ону тэҥэ бу сылга «Булуҥ улууһун Бочуоттаах олохтооҕо» буолбута.
Иннокентий Николаевич кэргэнэ Ульяна Прокопьевна 1948 сыллаахха Быыкапка төрөөбүтэ. 1966 сыллаахха олохтоох 8 кылаастаах оскуоланы бүтэрэн Дьокуускайдааҕы үп-кредитнэй техникумҥа үөрэнэ киирбитэ. Бу үөрэҕин 1969 сыллаахха ситиһиилээхтик бүтэрэн, төрөөбүт Быыкабар үлэлии кэлбитэ. Үлэтин «Арктика» холкуоһугар счетовод-кассирынан саҕалаабыта. Бу үлэҕэ 3 сыл үлэлээн баран нэһилиэк сэбиэтигэр бухгалтерынан анаммыта. Үлэтигэр бэриниилээх үлэһит ЫБСЛКС Киин кэмитиэтин «Молодой гвардеец пятилетки» бэлиэнэн, Бочуотунай грамотанан, Саха Өрөспүүбүлүкэтин Бырабыыталыстыбатын Махтал суругунан, 2000 сыллаахха «Үлэ бэтэрээнэ» мэтээлинэн, 2021 сыллаахха «Саха комсомола100 сылыгар» анал бэлиэнэн наҕараадаламмыта.
Кыыстара Посельская Ольга Иннокентьевна билигин Дьокуускайга олорор. 2006 сыллаахха СГУ –ну үөрэнэн менеджмент организации диэн идэни баһылаабыта. Үлэтин Булуҥ улууһун пенсионнай фондатын управлениетыгар саҕалаабыта. 2014 сыллаахха РФ Пенсионнай фондатын Саха Өрөспүүбүлүкэтинээҕи салаатыгар үлэҕэ киирбитэ. Билигин манна сүрүн эксперт испэсэлииһинэн үлэлиир. Кэргэннээх, икки оҕолоох. Кэргэнэ Посельскай Владимир Александрович, СГУ-ну 2007 сыллаахха бүтэрбитэ, английскай тыл учуутала.
Хотугу сир маанылаах ыала Колодезниковтар мурун бүөтэ 3 сиэннээхтэр. Дьиэ кэргэн нэһилиэктэригэр, улуустарыгар да киэҥник биллэр ыал. Кинилэр нэһилиэк олоҕор-дьаһаҕар общественнай үлэтигэр актыыбынайдык кытталлар, мэлдьи инники күөҥҥэ сылдьаллар. Олоххо уопуттарын эдэр дьоҥҥо, ыччаттарга сүбэ-ама быһыытынан тиэрдэллэр.
2020 сыллаахха Колодезниковтар дьиэ кэргэттэрэ «Семейная доблесть» бэлиэнэнэ наҕараадаламмыта. Кинилэр ааттара «Золотые семьи Якутии» сэттис кинигэтигэр (35стр.) киллэриллибитэ. 2024 сыллаахха Иннокентий Николаевич, кэргэнэ Ульяна Прокопьевна «День семьи, любви и верности» диэн Арассыыйа тэлэбиэдиэнньэтин тэрийэр кэмитиэтин анал мэтээлинэн наҕараадаламмыттара.
Төһө да бу бочуоттаах сынньалаҥҥа таҕысталлар, Иннокентий Николаевич тэһийэн олорбот. Ол курдук, быйыл кыһыҥҥы кэмҥэ 500 сэнтиниэр балык былааннааҕын 800 сэнтиниэр балыгы «Арктика» холкуоһугар туттарда.
Дьэ, ити курдук Булуҥ улууһугар, хотугу муустах байҕал модьоҕотун кытыытыгар турар дьоҕус түөлбэҕэ олохторун үлэҕэ анаан, билигин бочуоттаах сынньалаҥҥа олорон, оҕолоругар, дьоҥҥо-сэргэҕэ бэйэлэрин ыллыктаах тылларын тиэрдэллэр, сүбэ-ама буолаллар. Ульяна уонна Иннокентий Колодезниковтар Лаптев муоратын кытылыгар Быыкап Тумул арыытыгар сааскы күннэрин уруйдуу-айхаллыы көрүстүлэр уонна туундараҕа сайын кэлиитин кэтэһэллэр.
Семен Спиридонович Капитонов,
Арассыыйа суруйааччыларын сойууһун чилиэнэ,
поэт, СР культуратын үтүөлээх үлэһитэ,
Амма улууһун Бочуоттаах олохтооҕо.
2025сыл.
Хаартыска ааптар тиксэриитэ
-
0
-
0
-
0
-
0
-
0
-
0
