Элбэх идиэйэлээх эдэр дириэктэр
Хатыылар инникитин туох былааннаахтарын билээри агро-оскуола дириэктэрин кытта кэпсэттим. Владимир Тимофеев 29 саастаах эдэр салайааччы, кини Хатыы оскуолатыгар устуоруйа, обществознание, география биридимиэтин үөрэтэ сылдьан, үс сыл анараа өртүгэр, 26-гар дириэктэринэн анаммыта.
Виноград аһырбыта бу биэс сыллаах сыралаах үлэлэрин түмүгэ, 2020 с. Намҥа олорор сибэкки Дуунньаттан үнүгэс ылан олордубуттара бастакы сылыгар аһырбатаҕа эрээри, сыл ахсын биэрэр аһа элбээн иһэр.
«Оскуолатааҕы биисинэс-инкубатор диэн хайысханан муниципальнай гырааҥҥа кыттыбыппыт, бырайыакпытын көмүскээн, 7х5 иэннээх 500 000 солк. сыаналаах стеклопакет сылаас тэпилииссэ туруорбуппут. Бастакы былаан быһыытынан, төгүрүк сыл оҕурсуну үүннэрэн барбыппыт, арай эспэримиэн курдук Намтан сибэкки Дуунньаттан магия, киш-миш, мечта диэн суортаах виноград үнүгэһин ылан, бастаан сибэкки иһитигэр олордубуппут эрээри, тута аһырбатаҕа.
Магия виноград бастакы аһын 2022 с. биэрбитэ, оскуоланы бүтэрэр оҕолор банкеттарыгар бырааһынньыктааҕы остуолларын киэргэппиппит, эһиилигэр аһа өссө элбээн биэрбитэ, ону эмиэ үгэс быһыытынан выпускниктарбытын аһаппыппыт. Онтон быйыл магия уонна мечта суортар хаһааҥҥытааҕар даҕаны элбэх аһы биэрдилэр, отоно бөдөҥ, амтана соҕурууттан кэлэр винограттан олох атын, хайдах эрэ отон-сугун курдук амтаннаах. Барыта ситтэҕинэ атыылыыр былааннаахпыт, аһары үрдүк сыанаҕа тыа дьоно ылыахтара суоҕа, онон сөбүгэр соҕус сыанаҕа батарыахпыт. Куппут уубут, уоҕурдуубут ороскуотун сабар санаалаахпыт», — диэн Владимир Гаврильевич кэпсээнин саҕалыыр.
Нэһилиэккэ сайыҥҥы уу турбата суох, онон чугастааҕы күөлтэн бодобуос аҕалан кутан биэрэр, ону үлэҕэ уһуйар маастар Яна Николаевна Ефремова оҕолору кытта үүнээйигэ куталлар. Кыһыннары турар үүнээйилэри алын кылаас оҕолоро сөбүлээн көрөллөр-истэллэр, уу кутарга көмөлөһөллөр. Күн бүгүн виноград тэпилииссэ кыра аҥаарын ылар, сыл аайы аһа хойдон иһэр буолан, эһиил өссө элбэтэр былааннаахтар.
«Хас биирдии агро-оскуола туһунан суоллаах-иистээх буолуохтаах, бу иннинэ тигээйилэри тутан, мүөт ылар этибит. Тигээйилэри кыһын хоточчу саахарынан аһатыахха наада, онон бу салаа ночооттоох диэн тохтоппуппут. Сайын тигээйилэри сиргэ таһааран кэбиһэрбит, күһүн кэлэн хомуйааччыбыт. Улуус кииниттэн Хатыы саамай ыраах сытар нэһилиэк, сайыҥҥы өттүгэр суол-иис суох, кыһын 125 км. айанныахха наада.
Виноград тымныы тыйыс дойдуга ас биэрэрин туһугар куораттан уоҕурдууну сакаастаан ылан кутабыт, оттон турар буора бэйэлээх бэйэбит нэһилиэкпит киэнэ. Амтана ханнык буорга үүнэриттэн тутулуктаах быһыылаах. Хатыыбыт буоругар үүнэр буолан, сир аһын курдук амтаннаах», — диир оскуола дириэктэрэ.
Кини кэпсииринэн, Хатыыга 431 киһи пропискалаах эрээри, дьиҥэ 300-чэкэ киһи олорор дьоҕус дэриэбинэ. Кыра кэмпилиэктээх агро-оскуолаҕа 72 оҕо үөрэнэр, оскуола 1988 с. тутуу билигин олус эргэрдэ. Уочарат быһыытынан 2028-2029 сс. саҥа оскуола тутуллуохтаах, ону эрэнэ-долгуйа күүтэллэр.
Хаартыскалары Хатыы агро-оскуолата хааччыйда.
-
0
-
1
-
0
-
0
-
0
-
0
