--Быйыл олохпут укулаата тосту уларыйда. Коронавирус дьаҥа туран, хааччахтаныы эрэсиимин тутуһабыт. Спорт эйгэтигэр биир да тэрээһин буолбакка турар. Ол эрээри ыарыы арыый намыраабытынан, хааччахтааһыҥҥа кыралаан сымнатыылары киллэрэн эрэбит. Ол гынан баран, эпидемиологическай балаһыанньаны хонтуруоллуур тэрилтэлэр элбэх киһилээх күрэхтэһиини ыытары кытаанахтык боболлор. Социальнай ситимнэринэн “Бырабыыталыстыба өттүттэн ат сүүрдүүтүн тохтотоллор” диэн информация барбыт. Ол иһин балайда элбэх киһи миэхэ таҕыста. Ыытарга туруорсаллар. Бэйэм ат сүүрдүүтүн федерациятын өр кэм салайбыт киһибин, онон сахалар спорпут бу көрүҥүн өйүүбүн уонна бу курдук быһаарыныыны ылынным: Ил Дархан бирииһигэр ыытыллар ат сүүрдүүтэ от ыйын 4 күнүгэр Дьокуускайдааҕы судаарыстыбаннай агротехнологическай университет ипподромугар буолар. Ол эрээри көрөөччүтэ суох. “Саха” НКИХ быһа эфири оҥороругар сорудахтаатым. Онон бу сырыыга ипподромҥа тоҕуоруспакка, тэлэбиисэринэн көрүөхпүт. Аттар куоталаһарга бэлэмнэр. Төһө да уустук балаһыанньа бүүрүкээтэр, дьоммутун, хаһаайыстыбалары өйөөн, күрэхтэһии бирииһин улаатыннардыбыт -- 5 мөлүйүөн буолла, -- диэн иһитиннэрдэ Ил Дархан Айсен Николаев.
Манна даҕатан эттэххэ, бэс ыйын 27 күнүгэр Башкирия Уфа куоратын «Акбузат» ипподромугар ыытыллыбыт ат сүүрдүүтүгэр Саха сириттэн Александр Лиханов чөмүйүөннээтэ. Кини быйыл Казань, Москва, Уфа Пятигорскай ипподромнарыгар барыта 196 күрэхтэһиигэ кыттан, 26-гар бастаата, 120 төгүл бириистээх миэстэлэргэ тигистэ. Ол түмүгэр уопсайа 2 645 099 солкуобайы бириис быһыытынан ылла.
-
0
-
0
-
0
-
0
-
0
-
0
