Саха Өрөспүүбүлүкэтин Бырабыыталыстыбатын бэрэссэдээтэлин солбуйааччыта, Саха Өрөспүүбүлүкэтин норуоттарын VIII спортивнай оонньууларын тэрийэн ыытар хамыыһыйа бэрэссэдээтэлэ Сергей Местников:
-Күндү Уус Алдан улууһун олохтоохторо, ытык-мааны ыалдьыттара! Эһигини барыгытын Саха Сирин норуоттарын VIII спортивнай оонньуулара этэҥҥэ ыытылла туралларынан итиитик-истиҥник эҕэрдэлиибин! Уонна бу Мүрү алааһын туонатыгар саҥа ат сүүрдэр түһүлгэ тутуллан, олоххо киирбитинэн итиитик-истиҥник эҕэрдэлиибин!
Спартакиада бырагырааматыгар киирэн, харчы бүддьүөттэн көрүллэн, бигэргэтиллэн бу маннык улахан 1000 миэстэлээх, саҥалыы олбохтоох ипподром тутуллан киирбитэ олус диэн үөрүүлээх. Биһиги, саха норуота, ат сүүрдүүтүн олус диэн кэрэхсээн, сөбүлээн-таптаан көрөбүт. Бүгүҥҥү 1000 миэстэлээх ипподром толору көрөөччүлээҕэ олус киһини үөрдэр. Уонна бу маннык тэрээһин үгэс быһыытынан спартакиада официальнай бырагырааматыгар да киирбэтэр, куруутун ыытыллар Манчаары национальнай көрүҥнэргэ спартакиадаҕа, ону тэҥинэн, Саха норуоттарын спортивнай оонньууларыгар маннык ат түһүлгэтэ тэриллэн, ат сүүрдүүтүн күрэҕэ ыытыллара олус үчүгэй. Ол курдук, былырыын Манчаары оонньууларыгар Горнай Бэрдьигэстээҕэр ипподром оҥоһуллан-өрөмүөннэнэн киирбитэ. Онтон Уус Алдаҥҥа Чараҥ Маҥнайгы Хоро нэһилиэгэр саҥа ипподром тутуллан киирбитинэн өссө төгүл эһиэхэ итии-истиҥ эҕэрдэ! Куруутун бу түһүлгэ элбэх көрөөччүлээх буоллун, элбэх ат манна күрэхтэстин, Саха Сирин уонна улуустарын күрэхтэрэ куруутун ыытылла турдуннар!
Уус Алдан улууһун баһылыга, Саха Сирин норуоттарын VIII спортивнай оонньууларын чэрчитинэн ыытыллар ат сүүрдүүтүн күрэҕин сүрүн тэрийээччитэ Алексей Федотов:
- Үтүө-мааны күнүнэн, күндү биир дойдулаахтарым, убаастабыллаах Александр Николаевич, Сергей Васильевич! Биһиэхэ бу толооҥҥо улахан ат сүүрүүтэ буолбатаҕа балай да кэмнэр аастылар. Ол курдук, бу Оонньууларга биһиги 2014 сыллаахтан улуус хамаандата бэлэмнэнэн барбыта. Ханан аһаҕас баарый, ханан күүһүрдүллүөхтээхпитий, ханан эбиллэн биэриэхтээхпитий диэн түмүк оҥоһуллубута. Билигин улууспут хамаандата этэҥҥэ кытта сылдьар. Ол иһин улаханнык саҥарбаппыт. Сарсыҥҥы күн быһаарыылаах буолуо дии саныыбыт. Сибилиҥҥи кэмҥэ тустуу финаллара буола тураллар. Саҥа сиргэ, саҥа ипподромҥа бастакы сүүрүүлэр саҕаланалларынан эһигини итиитик-истиҥник эҕэрдэлиибин! Өссө сайдан, кэҥээн истин, бастыҥтан бастыҥнар күрэхтэһэр ипподромнара буоллун!
-
0
-
0
-
0
-
0
-
0
-
0
