Дьэ маннык күҥҥэ буоллаҕа тулуурунан тургутууну, дьулуурунан кыһарҕаны, сытыы өйүнэн күһэйиини туоруур саха киһитин килбиэнэ тахсара, өркөн өйө сытыырхайара. Баччаларга буоллаҕа балаҕан халҕанын аа-дьуо аһан, атыллаан киирэн кэлэр кэтэһиилээх-күүттэриилээх олоҥхоһут хонордуу оҥостон киирэн кэлэрэ. Дьэ, эрэ диэн оҥорору оҥоро охсон, туран -олорон, киирэн-тахсан сэргэхсийэн сэксэс гына түһэн чэмэлийэ сырдаан сандалы бастыҥ, бас өттүгэр олордон сыалаах этинэн сыҥалаан, хоргуннаах миининэн хадаҕалаан, амтаннаах аһынан маанылаан тоһуйаллара.
"Чэ саҕалыахха", — диэтэ да чуумпура охсон бастаан наҕыллык, оргууй- оргууйдук орто дойду айыыллыытын ойуулаан оҥорон көрө-көрө тупсаран, айан ыла-ыла астыннаран, эбэн биэрэ-биэрэ илиитин иһигэр эпсэри киллэрэн төрөөбүт тылбыт сөлөгөйүнэн күндүлээн, сахабыт тылын бастыҥар сөтүөлэтэн, күүскэр күүс эбэн хараххын симтиҥ да аҥаат-муҥаат алаастарга тиийэн халлааҥҥа харбаспыт хайалары дабайан, куйаарга көтөн тахсан көрбөтөххүн көрөн, истибэтэххин истэн "ноо" диэн киксэрэн биэрэн инникини ойуулаталлара, кэлэн иһэри кэпсэттэрэллэрэ. Дьэ онно буоллаҕа дии омуннууру омнуолаабакка, эбэн биэрэри сиилээбэккэ, суоҕу баар диири баалаабакка оннуук-оннук диэн ылыналлара. Олоҥхобут баар буолан тоҥтон толлубат, илиһиннэрэр итииттэн иҥнибэт, сиксийэр сытыы тыал силлиэрэриттэн сиҥнибэт саха омук буолан саарыннардаахпыт, ыйар-кэрдэр киһи киэнэ килбиэнэ дьоннордоохпут.
Хаартыска: https://triptonkosti.ru/2-kartinki/yakutsk-zimoj-kartinki.html
-
0
-
0
-
0
-
0
-
0
-
0
