Дьорҕоот санаа добун дорҕоонун, хотоойу санаа харса суох тыынын, сайаҕас санаа сайа охсор салгынын, тоҥтон толлубаты, итииттэн илистибэти, силлиэҕэ сиҥнибэти, буурҕаҕа буулаппаты, силбиккэ сиигирбэти оргууй-оргууй саҥаран, наҕыллык саҕалаан, ойуулаан, дьүһүйэн, онтон улам-улам иһигэр киирэн истэҕин ахсын омун-төлөн тыыннанан оргуйа турар олгуйдуу түллэҥэлиир, охсуһууну ойуулаатаҕына ойон туран, илбис тыынын эттэҕинэ иэнэ кэдэҥнээн, кырдьык даҕаны диэн итэҕэтэн "оннуук-оннук" дэттэрэр олоҥхоһуттаах улуу омук - саха!
Сэттэ ый тухары сиксилдьитэр силлиэттэн, ытырбахалыыр тымныыттан сэниэтэ эстибэккэ, алта ый тухары айгыстар, аарыгырар аам-даам аргыартан, хамсаабакка сытар халыҥ хаартан хал буолбакка, тумарыкка суулуур тумантан толлубакка, саныы -саныы манньыйа күүтэр сандаархай сааскылаах, этэн көрө-көрө ымманыйа күүтэр сайыҥҥылаах - саха!
Сайаҕас санаатын, инникигэ эрэлин, туллубат тутаахтаах, силлибэт сииктээх, хамсаабат өһүөлээх, сөллүбэт баайыылаах, бырда быстыбат туругун түөрэҕэ хамсаабат төрөөбүт төрүт тылбытынан, түгэҕэ көстүбэт, улаҕата биллибэт барҕа баай өбүгэбит тылынан ойуулуур -дьүһүннүүр, омунннаан эттэххэ диэн обургу соҕустук үлүннэрэр, эбэн биэрэн эттэххэ ситигирдик диэн ситэрэн биэрэ - биэрэ сиксилдьитэр, имэҥин эптэххэ итиччэ буолар диэн илбистээх тылынан эпсэри биэрэр, харса суоҕу киллэрдэххэ саманнык диэн хаптас гыныахха диэри хабырыын охсуһууну ойуулуур олоҥхоһуттаах саха!
Сайдыылааххын ээ диэн саллыбакка, туйгуҥҥун ээ диэн толлубакка, атыҥҥын диэн атыҥыраабакка, туспаҕын ээ диэн туора туппакка бэйэ бодону ыһыктыбакка кими да атаҕастаабакка даҕаны атаҕастаппакка даҕаны, бөө диэтэхтэринэ бөтө бэрдэрбэккэ, тугуй доо диэн тургутустахтарына туура саайтарбакка сылдьары сыа-сым курдук сыһыары тутан уостан-уоска илдьэ сылдьан кэлин сурук-бичик саҕана суоруллубаттыы суруйбут, умнуллубаттыы үйэтиппит олоҥхолоох - саха!
Хаартыска: https://yk24.ru/main/den-olonho-otmechayut-v-yakutii-25-noyabrya/
-
0
-
0
-
0
-
0
-
0
-
0
