Бу бырагыраама чэрчитинэн төрөөбүт тылбыт сүмэтин-сүөгэйин сүтэрбэт туһугар үтүө үгэстэрбитин, үөрүйэхтэрбитин умнубакка, хаҥыннарбакка сайдыылаах олохпут хардыытыгар тэбис тэҥҥэ ханыылаһыннаран, алтыһыннаран биэриэхтээхпит.
Хас биирдии омук, норуот бэйэтэ аал-луук мастаах, ол маһын силиһэ-мутуга дириҥ лабаата элбээн лаглайан кинини норуот быһыытынан атын дьону кытта бииргэ буоларыгар биир ньыгыл ойуур тыатын курдук буолар. Онтон сайдыылаахтар ээ диэн сайыһан ол диэки салаллан, бастыҥнар ээ диэн ол диэки барсан, чулуулар ээ диэн ол диэки чугаһаан истэхпитинэ, кэлин тиһэҕэр омук быһыытынан сүтүөхпүтүн сөп.
«Олоҥхо олохпут ситимэ» бырагыраама сүүрбэччэ сыл быстыбакка, сүтэн-иҥэн хаалбакка ылбыт тэтимин ыһыктыбакка кэллэ. Ол кистэлэҥэ, мин санаабар, олоҥхо уйаара-кэйээрэ биллибэт дириҥ далай силиһигэр-мутугар сытар. Бырагыраама кылаан чыпчаалын биир сырдык сардаҥата олоҥхону толоруу этэ.
2022 сыллаахха С.А.Зверев-Кыыл Уолун “Кулан кугас аттаах Куллустай Бэргэн” олоҥхото испэктээк буолан туруоруллубута. Ол кэнниттэн РФ үтүөлээх, СӨ норуодунай артыыһа, дьиҥ саха саарына, Хатас нэһилиэгин олохтооҕо Герасим Семенович Васильев күргүөм ааҕыыга холонууну, үөрэниини саҕалаабыта.
Сүбэ мунньах кэннэ С.С.Васильев – Борогонскай “Күн Эрили” олоҥхотун ылбыппыт. Түбүктээх үлэ Өймөкөөҥҥө буолбут Олоҥхо ыһыаҕар бастакы хардыыны оҥорбута.
“Тускул” култуура киинэ биир ситимҥэ баар Дьокуускай куораттааҕы норуот айымньытын киинин атын кэлэктииптэрин кытта бииргэ үлэлэһэр, ордук таһаарыылаахтык айар-тутар суолбутугар Лариса Константинова Андреева салайааччылаах “Арчы” духуобунас киинин уонна Юрий Васильевич Спиридонов салайааччылаах “Үргэл” Арт галереяны кытта бииргэ алтыһабыт. Ол курдук быйылгы 2023 сылга олоҥхоҕо анаммыт тэрээһиннэрбит оскуола оҕолоругар кэпсээһинтэн, саламааты буһарыыга, оонньууру, киэргэли оҥорорго, остуол оонньууларыгар, төрүт оонньууларга маастар-кылаастартан, викторинаттан саҕалаан, өрөспүүбүлүкэ дьонун истиилэригэр “Тэтим” араадьыйа долгунугар тахсыбыппыт.
Манна биһиги куруутун алтыһар Саха араадьыйа эрэдээктэригэр Валентина Дмитриевна Петроваҕа махталбыт муҥура суох. Тэрээһиннэрбит түмүктүүр түһүмэҕинэн сэтинньи 30 күнүгэр “Арчы” дьиэтигэр “Күн Эрили” олоҥхотун ааҕыыбытын толору видеоҕа устуу буолла. Бу үлэбит “Тускул” «Ютуб” ханаалыгар, архыыпка киириэ. “Арчылар” бу тэрээһиҥҥэ сүрдээх үчүгэйдик, кыһамньылаахтык сыһыаннаспыттарыттан ис сүрэхпититтэн үөрдүбүт, махтана санаатыбыт. Көмүлүөк оһоҕу оттон хас биирдии саха киһитигэр ахтылҕаннаах оттук мас умайар тыһырҕас тыаһын иһиттибит, сылааһыгар сылаанньыйдыбыт.
-
0
-
0
-
0
-
0
-
0
-
0
