Хара тыа барахсан киэҥ дуолугар оҥоойуктааҕы күндүлээри, ыаҕайалааҕы тотороору, солуурдааҕы астыннараары бүччүм сиргэ буһарбытын, кистэлэҥ муннукка кыыһа кытардыбытын-хараардыбытын, көҕөрдүбүтүн өлүүкэ-өлүүкэ көрдөрдүбүтүн, наардаан, сааһылаан таба тайаннарбытын силистиин-мутуктуун туурбакка, имири эспэккэ сэрэниин - сэрэнэн ытыс үрдүгэр түһэрэн махтана, дуоһуйа сөптөөҕүнэн көрөн хомуйуоҕуҥ, эһиил баччаҕа эмиэ маннык күндүлээр диэн көрдөһүөҕүҥ.
Мындыртан мындыр Аар айылҕа Аан Дархан харабыла тэҥкэ тиит бас билиитин - тайҕатын таабырынын таайыытын, дьиктилэрин кистэлэҥин кэлбиккэ эрэ барытыгар арыйбат, киирбиккэ эрэ барытыгар сипсийбэт. Сэһэнин-сэппэнин сиһилии сэһэргиирин айылҕа оҕото - өркөн өйдөөх- санаалаах саха киһитэ барахсан өйдүөҕэ, долоҕойугар түһэриэҕэ, чөмчөкөтүгэр киллэриэҕэ.
Тайҕаны-тыаны, сыһыыны, хонууну, угуттуур уулаах сыккыстары, үрүйэлэри, үрэхтэри, өрүстэри,чүөмпэлэри,элгээннэри, күөллэри харыстыыр, харыһыйар эрэ буоллахпытына чэбдик ыраас салгыннаах, дьэҥкир уулаах буолуохпут. Хара буортан бараммат баайы буллубут, бүппэт үптээх - харчылаах буолуохпут диэччилэри итэҕэйимиэҕиҥ, ыларга эрэ ыраланымыаҕыҥ. Туох барыта тоҕо диэн токкоолостоххо тордуохтаах, хайдаҕый диэн хааххайдастахха хабыр хардалаах буолуон сөбүн өйдүөҕүҥ. Үтүө сайыҥҥы күннэргэ үлүмнэһэ үөрүөҕүҥ, астына-дуоһуйа сынньаныаҕыҥ!
Ааптар хаартыскаҕа түһэриитэ.
- 0
- 0
- 0
- 0
- 0
- 0