Аар айылҕа маанылаах маҥан мастара хотун хаан хатыҥнар силистэрэ сир сиигин иҥэринэн, ууллубут хаар уутун ыймахтаан ибир сибир сибигэнистилэр, хоммут уостарын хоҥуннаран, өрөөбүт уостарын өһүлэн тыллар- тиллэр турукка киирдилэр, үнүгэстэрин тилиннэрдилэр, хара тыа харабыла, баай тайҕа харысхала тэҥкэ тиит дөрүн-дөрүн көхсүн этитэн, дьоһун дьоһуннук эргиччи көрдө, чарапчылана- чарапчылана ырааҕы одуулаата, кыҥыы, кыҥыы кыраларын кыҥастаста, куруутун чэбэр, сыыс- буор сыстыбатах, кыһыннары-сайыннары көп түүлээх, күөх киистэлээх бэс чагда бастыҥнара бэрдьигэс уолаттар бэртэрин биллэрэн бэттэх диэки буоллулар, үһуктуу уоҕун иҥэринэн уунан тиийбэт гына уһаатылар, сэргэхсийии сэниэтин иҥэринэн сэбэрэлиин кэрэтийдилэр, иирбэ-таарба олохпут хардыытыныы иилистиҺэ иилиҥкэйдэһэн, ыһыктыбаттыы ыкса тутуһан иирэ талах биэрэги бэрийдэ, биэтэги кэрийдэ, түү кыламанынан сапсынна. Хонууга хоһуун санаалаах ньургуһун тоҥтон толлубакка, тымныыттан чаҕыйбакка ити диэкиттэн тахсан кэллэ, бу диэкиттэн быкта.
Көҥүлү ылбычча хаҥыл хааны оонньотон, Баай Байанайтан бэриһиннэрээри, өлүүлэһэн ылаары эр дьоммут эрэллээх доҕордорун - сааларын-саадахтарын чуумпурунан ыраастаатылар, кыҥаан көрө- көрө кыһалыннылар, кыра да быылы хаалларбатылар. Дьиэ хараҥаччылара, хаһаайкалар ханарыһа хаамтылар, түбүгүрэ сүүрдүлэр алаадьылаан сырылаттылар, хаһаас астарын таһаардылар, уурунуу астарын утары ууннулар. Баайыыга турбут Баһырҕастар, Бэргэннэр, Атаскааннар көҥүл көччүйдүлэр, аналларын толорон аҕылаһа сүүрдүлэр, мэҥийэ мэниктээбиттэр дьарылыннылар, солуута суох буолбуттар сонно тута мөҕүллүннүлэр. Өйдөөх өттө табыллыбыт куһу үөстэн таһааран, сууллубут куһу ууттан хостоон хайҕанна, амтаннаах аһынан хадаҕаланна.
Хотоннорго ынах маҥыраата, саҥа төрөөбүт ньирэй мэҥирээтэ, сыһыыларга сыспай сиэллээх сыбыытаата.
Тоҕотун токоолоспокко, хардатын билбэккэ үөрүү кыыма үөскүүр кэмэ СААС!
Эргийдиҥ да эйэҕэс эҕэрдэ, хайыстыҥ да хайгыыр ,көрө түстүҥ да кэрэхсиир харах кэмэ СААС!
Сааскы саҥа күнүнэн сэгэрдээр. Үлүмнэһэ үлэлиэҕиҥ, үөрэ- көтө көрсүһүөҕүҥ. Саарбахтыыр санааҕа баттаппакка, сайаҕас санааны сааһылаан- наардаан сайдар саҕахтары арыйыахха, аламаҕай санаанан салайтарыахха. эрэҥкэдийэр санааҕа эриллибэккэ эрэл санааны бэрийэн- тэрийэн, бэрээдэктээн инникигэ эрэли үөскэтиэххэ!
Эрэдээксийэ хаартыската.
-
0
-
0
-
0
-
0
-
0
-
0
