Түһүлгэ

Ол курдук кулун тутар 25 күнүгэр Өрөспүүбүлүкэтээҕи волонтердар кииннэрэ тэриллэн, туох да хос санаата суох кыһалҕалаахтарга көмөлөһөр волонтер дьон үлэлэрин саҕалаабыттара. Хайыы-үйэ ыйтан ордук үлэлээбит хамсааһыҥҥа уопсайа 2,5 тыһыынча киһи кыттыһан үлэлии сылдьар. Эдэр гвардеецтар, Волонтердар корпустара, Кыайыы волонтердара, Эмчит волонтердар уонна атын уопсастыбаннай тэрилтэлэр күүстэрин холбоон бу кииҥҥэ үлэлии сылдьаллар. Улуустарга эмиэ арыллыбыттар. Уус Алдаҥҥа 140 киһи көмөҕө үлэлэһэ сылдьар, Мэҥэ Хаҥаласка – 124, Булуҥҥа – 33 волонтер бу хамсааһыҥҥа кыттыспыт.Волонтердар дьиэлэриттэн тахсыбакка олорор кырдьаҕастарга бородуукта, эмп-том атыылаһан илдьэллэр.

Волонтердарынан оскуола үөрэнээччилэрэ, устудьуоннар, орто саастаах дьон буолуохтарын сөп. Волонтер буоларга баҕалаах киһи бастаан онлайн-үөрэх ааһар, онтон миэстэтигэр кэлэн хайдах үлэлиэхтээҕин туһунан ыйыы-кэрдии ылар.

Бары да дьиэҕэ олорор буоламмыт, волонтерскай үлэ туһунан интернет ситимнэриттэн билэбит. Мин да онтон хаалсыбакка, эдэр дьон ис сүрэхтэриттэн баҕаран туран үлэлииллэрин кэрэхсии эрэ көрөрүм. Ол курдук, Лилия Соловьева диэн волонтердар хамсааһыннарыгар кыттыспыт эдэр киһини кытары билиҥҥи үлэлэрин туһунан кэпсэттим.

Лилия урбаанньык, “ЛаДива” диэн үҥкүү оскуолатын тэрийээччитэ. Харантыын биллэрбиттэрин кэннэ, кини оскуолатын сабарга күһэллибитэ. “Волонтердар хамсааһыннарыгар мин хайдах кэлбиппиний? Кулун тутар ыйга карантин биллэрэннэр, элбэх тэрилтэлэр сабыллыбыттарын кэннэ, үс нэдиэлэ дьиэбэр олорон баран, салгыы бу курдук быар куустан баран олоруохпун баҕарбатаҕым. Үлэлииргэ, сүүрэргэ-көтөргө угуйар энергиябын тугунан эрэ таһаарарга баҕалааҕым. “Арена 31” диэн ыччат киинин дириэктэрэ Николай Мартынов волонтердар хамсааһыннарын иһинэн араас акция ыытарын интернет ситимиттэн ааҕаммын, киниттэн мин көмөм наада дуо диэн ыйыппытым. Онуоха кини волонтердар хамсааһыннарыгар кыттыһарга ыҥырбыта. Бу кэмҥэ кырдьаҕас дьоҥҥо босхо бородуукта нобуорун түҥэтии акциятын үлэтэ саҕаламмыта. Билигин мин бу акция сүнньүнэн үлэлии сылдьабын, “Арена 31” бородуукта ыскылаатыгар”, -- диэн Лилия кэпсээтэ.

Өрөспүүбүлүкэтээҕи волонтердар куорпустара иһитиннэрбитинэн, акция саҕаланыаҕыттан 65 саастарыттан үөһээ саастаах дьоҥҥо 5 тыһыынчаттан тахса босхо бородуукта нобуорун тиксэрбиттэр. Холобур, ыам ыйын 3 күнүгэр волонтердар 500 тахса бакыаты түҥэппиттэр.

“Бородуукта нобуора бигэргэммит испииһэгинэн оҥоһуллар уонна уопсай сыаната 500 солкуобайга тэҥнэһэр. Бородуукталары “Альфа-групп” хампаанньа уонна атын чааһынай тэрилтэлэр үбүлээбит харчыларынан атыылаһабыт. Билиҥҥитэ 15 тыһыынча сайаапка киирэ сытар, 5 тыһыынчаттан тахса бородуукта нобуорун түҥэттибит. Бородуукта биир кэмнээх көмөнөн буолар”, -- диэн Лилия салгыы кэпсиир.

Мин кэпсэтиибит түмүгэр көмөнү туһанааччылар волонтердарга сыһыаннарын туһунан ыйыттым. “Махтанар уонна волонтер үлэтин өйдүүр дьон элбэх. Ол быыһыгар барытын куһаҕан өйдөбүллээхтик ылынар дьон эмиэ баар. Босхо кэлбит бородууктаны мыыналлар, интернеккэ таһаарбыт хаартыскаҕа атын бородуукталар этэ диэччилэр, сайаапка биэрэн баран түргэнник ыла охсуон баҕарааччылар бааллар. Ол барыта буор-босхо, ис сүрэҕиттэн үлэлии сылдьар волонтеру хомоторо биллэр. Ол эрээри үтүө тылынан махтанар аҕа саастаах дьон элбэхтэр, кинилэр биһиги үлэлиир баҕабытыгар күүс-уох эбэллэр. Бу куһаҕан ыарыы аҕалбыт кыһалҕатын туоратыыга өссө да үлэлэһиэхпит”, -- диэн Лилия үлэтин туһунан кэпсээнин түмүктээтэ.