Саха сирин Далбар хотуттарын дьыалабыай хаачыстыбалара, дьоҕурдара өрөспүүбүлүкэ олоҕун бары эйгэтигэр чаҕылхайдык көстөр. Кырдьыга даҕаны, дьахтар баһылаабатах идэтэ диэн суох! Эһиги туһалаах баайы сиртэн хостооһунтан саҕалаан судаарыстыбаны салайыыга тиийэ ситиһиилээхтик үлэлиигит.
Ону тэҥэ, эһиги мэлдьи истиҥ ийэ, тапталлаах кэргэн, эйэҕэс эбэ, кыһамньылаах эдьиий, балыс уонна нарын кыыс оҕо буолан олохпутун сырдатаҕыт, алаһа дьиэбитин араҥаччылыыгыт, иэримэ дьиэбитин иччилиигит. Аламаҕай сыһыаҥҥытынан, абылыыр кэрэҕитинэн бу Орто дойдуну тапталынан угуттуугут, үтүөнү үксэтэҕит. Биһигинэн киэн туттаргыт туһугар эр дьон ситиһиилээх, күүстээх, бастыҥтан бастыҥ буоларга дьулуһабыт.
Бүгүн эһиэхэ – Россия Федерациятын көмүскэлигэр туруммут, анал байыаннай дьайыыга эйэлээх олох иһин туруулаһа сылдьар байыаннай сулууспалаахтарбыт ийэлэригэр, ойохторугар, эдьиийдэригэр, балыстарыгар, кыргыттарыгар – ураты долгутуулаах күн: ким кэргэнин, ким аҕатын, оҕотун, убайын, быраатын, доҕорун, ким таайын, абаҕатын ахтар-саныыр, суохтуур. Бу күннэргэ Саха сирин уонна бүтүн Россия олохтоохторо эһигини кытта бииргэ чугас дьоммут туһугар долгуйабыт.
Байыаннай сулууспалаахтары уонна кинилэр дьиэ кэргэттэрин өйүүр, кинилэргэ көмөлөһөр Саха сирин волонтердарын хамсааһынын кэрэ аҥаардарыгар махтанабын уонна эҕэрдэлиибин!
Барыгытыгар кытаанах доруобуйаны, баҕа санаа туолуутун, ситиһиилэри уонна дьолу баҕарабын! Таптааҥ уонна тапталлаах буолуҥ!
Аан дойду дьахталларын күнүнэн истиҥ эҕэрдэ!
Саха Өрөспүүбүлүкэтин Ил Дархана А.С. Николаев
-
0
-
0
-
0
-
0
-
0
-
0
