Издательский дом Редакция Подписка
Погода в Якутске: . -14 oC

Ил Түмэн тыа сирин уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин Мэҥэ-Хаҥалас улууһугар Сылгыһыт күнүн көрсө ыытыллыбыт тэрээһиннэргэ кыттыыны ылла.

Ил Түмэн тыа сирин уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин Мэҥэ-Хаҥалас улууһугар Сылгыһыт күнүн көрсө ыытыллыбыт тэрээһиннэргэ кыттыыны ылла.

Кулун тутар 15 күнүгэр Мэҥэ-Хаҥалас улууһугар тыа хаһаайыстыбатын сылларыгар уонна кэлэн иһэр сылгыһыттар күннэригэр аналлаах улуустааҕы сылгыһыт күрэҕэр  кэлбит ыалдьыттары «Мэҥэ-Хаҥалас улууһа» МТ баһылыгын 1-кы солбуйааччы Василий Михайлов, СӨ Ил Түмэн судаарыстыбаннай Мунньаҕын дьокутаата Андрей Находкин, I Баатара нэһилиэгин баһылыга Петр Андросов эҕэрдэлээтилэр.

Санатан эттэххэ,  мэҥэ-хаҥаластар 2023-2026 сыллары тыа хаһаайыстыбатын сайыннарыы сылларынан биллэрбиттэрэ.

сылг находкин

Бу күн сылгыһыт Күнүгэр анаммыт үөрүүлээх тэрээһин 1 Баатара нэһилиэгэр ыытылынна. Манна «Дьөһөгөй бэлэҕэ» кылтан-сиэлтэн оҥоһуктарга уус-уран быыстапкаҕа быйыл 6 нэһилиэктэн барыта 18 норуот маастара кэлэн бэйэлэрин араас эгэлгэ оҥоһуктарын көрдөрүүгэ туруордулар.

Маны таһынан,  сылгыһыттар уонна улуус салайааччылара төгүрүк остуол тула олорон санаа атастастылар, баар кыһалҕалары дьүүллэстилэр. Кэпсэтиини «Чүүйэ» МУТ салайааччыта Аркадий Лукин салайан ыытта. Манна сылгы, ынах сүөһү төбөтүгэр киирэр көмө харчыны хойутаппакка сыл саҥатыгар киирэрэ буоллар дьон үлэни-хамнаһы эрдэттэн дьаһанарыгар көдьүүстээх буолуоҕун, сири ыаллыы улуустартан арендаҕа ылыы боппуруоһун үөрэтэр наадатын, хаар халыҥа сылгы хаһан аһыырыгар уустуктары үөскэппитин, от састаабыгар микроэлемент тиийбэтин учуонайдар үөрэтэн көрүүлэрэ наадатын,  сылгы, убаһа этин тутуу былаана туолбатын туһунан, мобильнай биригээдэлэр техникаларын саҥардыыга, улуус иһигэр баар сири толору туһаныыга, сылгыны дэриэбинэ иһиттэн, дьиэ таһыттан тэйитэн үөрдэтэн иитиигэ үлэ барара наадатыгар о.д.а. кыһалҕалары дьүүллэстилэр.

Маны тэҥэ, эдэр көлүөнэ ыччат дьону төрүт дьарыкка сыһыарар, сылгы иитиитигэр киллэрэр инниттэн саҥа суолу тобулуохха диэн боппуруоһу туруордулар. Холобура, эдэр сылгыһыттарга хамнас кээмэйиттэн саҕалаан, атын да көрүҥ эбии төлөбүрдэринэн өйөбүлү оҥорууну толкуйдуохха диэн кэпсэттилэр.

сылг награда

Мунньах үөрүүлээх чааһыгар бастыҥ сылгыһыттары чиэстээһин саҕаланна. Норуот дьокутаата Андрей Находкин мустубут сылгыһыттары  эҕэрдэлээн туран, өрөспүүбүлүкэ тыатын хаһаайыстыбатын сайдыытыгар тус кылааттарын киллэрбит бастыҥ сылгыһыттарга Ил Түмэн наҕараадаларын туттартаата. Ол курдук, Ил Түмэн сис кэмитиэтин Бочуотунай Грамотатынан Холмогоров Николай Васильевич (ИП КФХ «Винокуров С.П.») уонна Птицын Иннокентий Петрович (КФХ СП «Мэлдьэхси нэһилиэгэ») наҕараадаланнылар.

сылг итог возле маш

Салгыы үгэс буолбут улуустааҕы «Сылгыһыт күрэҕэр» агро-хайысхалаах оскуолалар үөрэнээччилэрин икки ардыларыгар «Дьөһөгөй оонньуулара» күрэх аан маҥнай ыытыллыбыта сонун көстүү буолла. Күрэххэ үрдүкү кылаастар үөрэнээччилэрэ кыттааччылаах 7 хамаанда күөн көрүстэ. Оҕолор бастыыр иһин сатабылларын, сымсаларын, тобуллаҕас өйдөрүн тургуттулар. Ол курдук, хамаанданы билиһиннэрии, бас быаны баайыы, тоҥуу хаарынан сүүрүү, кууллаах бурдугу көтөҕөн баран сүүрүү, ыйытыкка хоруйдааһын, эстэпиэтэ, аты көлүйүү түһүмэхтэргэ уолаттар илин-кэлин түһүстүлэр. Ыччаты төрүт үгэскэ сыһыарарга, Дьөһөгөй оҕотун оонньууларыгар уһуйарга, уол оҕо эт-хаан, өй-санаа өттүнэн сайдарыгар маннык тэрээһин олус туһалаах уонна наадалаах буолара көһүннэ.

сылг дети парад

Дьүүллүүр сүбэ түмүгү таһааран кыайыылаахтары наҕараадалаатылар, хамаандаларга тустаах анал ааттары туттардылар. 

сылгы выставка

Күн иккис аҥаарыгар «Сылгыһыт күрэҕин» көрөөрү, ыалдьаары Бэдьимэ ипподромугар бэрт үгүс дьон муһунна.  Түөрт түһүмэхтэн турар хамаанданан күрэххэ, хас биирдии хамаанда састаабыгар түөртүү эр дьон кытыннылар. Уопсайа 7 хамаанда кытынна.

сылг дети на сцене

Хамаандалар ат тэрилин сүкпүтүнэн 100 миэтэрэҕэ сүүрүүгэ, 600 миэтэрэҕэ аты ыҥыырдаан уонна бэрэмэдэйдээх сүүрдүүгэ, сыарҕалаах атынан сыыдам айан, мэһэйдэри ааһыы түһүмэхтэригэр илин-кэлин түһүстүлэр.

сылг дети с лошадью

Сүрүн күрэхтэһии өрөспүүбүлүкэтээҕи балаһыанньанан ыытылынна. Күрэхтэһиини Серафим Терентьев иилээн-саҕалаан ыытта. Сүрүн судьуйанан улуустааҕы сылгыһыттар түмсүүлэрин салайааччыта Михаил Егоров үлэлээтэ.

сылг взрослые победители

Күрэх түмүгүнэн: I миэстэни -   Нөөрүктээйи нэһилиэгэ ылла, II миэстэҕэ Мөҥүрүөн нэһилиэгин 1  хамаандата таҕыста, III миэстэҕэ 1-кы Наахара нэһилиэгэ тигистэ.

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением