Алтыс ыҥырыылаах Ил Түмэҥҥэ билиҥҥитэ наука 5 дуоктара уонна наука 9 хандьыдаата үлэлиир.
Судаарыстыбаннай Мунньах Бэрэссэдээтэлэ -- Алексей Еремеев бэлитиичэскэй наукалар хандьыдаата. Бастакы солбуйааччыта Александр Жирков – историческай наукалар хандьыдаата, доцент. Спикер солбуйааччыта Антонина Григорьева – педагогическай наукалар дуоктара.
Ил Түмэн ыччат дьыалаларыгар, физическэй култуураҕа уонна спорка сис кэмитиэтин бэрэссэдээтэлэ Михаил Гуляев – педагогическай наукалар хандьыдаата, Ил Түмэн наукаҕа, үөрэххэ, култуураҕа, сонуннары киэҥник тарҕатар сириэстибэлэргэ уонна уопсастыбаннай тэрилтэлэр дьылаларыгар сис кэмиэтин бэрэссэдээтэлэ Феодосия Габышева – педагогическай наукалар дуоктара, Ил Түмэн бүддьүөккэ, үпкэ, сыана бэлиитикэтигэр, итиэннэ бас билии уонна приватизация боппуруостарыгар сис кэмитиэтин бэрэссэдээтэлэ Юрий Николаев – тиэхэньиичэскэй наукалар хандьыдаата.
Норуот дьокутаата Анатолий Николаев – биологическай наукалар дуоктара. Кини өссө Саха Өрөспүүбүлүкэтин альма-матерын – М.К. Аммосов аатынан Хотугулуу-Илиҥҥи федеральнай университеты—салайар ректор.
Салгыы сырдаттахха, Любовь Явловская – мэдиссиинискэй наукалар дуоктара. Юрий Баишев –педагогическай наукалар хандьыдаата, Семен Березин – экэнэмиичэскэй наукалар хандьыдаата, Сергей Ларионов, Михаил Эверстов уонна Иван Слепцов – тиэхэньиичэскэй наукалар хандьыдааттара. Роза Солнышкина – педагогическай наукалар хандьыдаата.
Александр Николаевич Жирковка М.К. Аммосов аатынан Хотугулуу-Илиҥҥи федеральнай университет «Бастыҥ выпускник – университет киэн туттуута» бочуоттаах аата иҥэриллибитэ. Дьокутаат Саха судаарыстыбаннай университет историческай салаатыгар үөрэммитэ. Туйгуннук үөрэнэн, кыһыл дипломнаах бүтэрбитэ. Өрүү инники күөҥҥэ сылдьар лиидэр, устудьуоннар тутар этэрээттэрин салайар хамандыыр этэ.
Александр Николаевич -- бэрэпиэссэр Георгий Прокопьевич Башарин элбэҕи эрэммит уонна кини эрэлин толору толорбут чаҕылхай үөрэнээччитэ.. Ол курдук, Александр Жирков үүнүүтүн кэрдииһин кэмнэрэ университеты кытта быстыспат ситимнээх: аспирант, үөрэммит факультетын ССРС историятын кафедратын ассистена, ыстаарсай преподаватель, Саха Сирин уонна Арассыыйа Хотугулуу-Илиҥҥи норуоттарын историятын уонна култууратын кафедратын доцена.
Михаил Гуляев биһиги хаһыаппытыгар интервью биэрэригэр, бу курдук кэпсээбитэ:
--Диссертациябын баай педагогическай уопуппар олоҕуран суруйбутум. Үөрэх миниистиринэн Егор Петрович Жирков олорон, 1994 сыллаахха Саха Сириттэн 6 учууталы уонна 6 учуонайы Эмиэрикэҕэ кууруска ыыппыта. Онно сылдьаммын, орто оскуола базатыгар үрдүк үөрэҕи тэрийэн, ситимнээн үөрэтэллэрин билбитим. Итинтэн идиэйэ үөскээбитэ – тыа сиригэр үрдүк үөрэх кыһатын арыйар. Чурапчытааҕы физкултуура уонна спорт института тэриллэн үлэлээбитэ 21 сылын туолбута.
Научнай үлэбин эрэгийиэн таһымыгар физкултуураны сайыннарыы тиһигин тэрийии уонна салайыы уратыларыгар анаан суруйбутум. Хандьытааппын 2002, дуоктарскайбын 2012 сыллаахха көмүскээбитим. Ол саҕана Бырабыыталыстыба бэрэссэдээтэлин солбуйааччы буоламмын, үрдүк дуоһунастаах сирэй бэйэтин эрэгийиэнигэр көмүскэниэ суохтаах диэн быраабылаҕа олоҕуран, Арассыыйатааҕы Физкултуура уонна спорт университетын дуоктарскай сэбиэтин иннигэр тиийэн көмүскээбитим.
Феодосия Габышева үөрэх уонна наука миниистиринэн үлэлээбитэ. Онон элбэх научнай бырайыагы сүрүннээбитэ. Билигин “Эркээйи эргиирэ” бырагырааманы суруйар кэллиэгийэни салайар, Наука академиябытын иһинэн оҕону төрөөбүт тылынан үөрэтиини чинчийэр туспа институту туруорса сылдьар, о.д.а. түбүгэ үөрэҕирии эйгэтигэр үгүс. Феодосия Васильевна наар этэр: “Ханнык баҕарар сайдыы, үөрэх барыта наукаҕа олоҕуруохтаах”, -- диэн.
Чахчыта да, оннук. Түгэнинэн туһанан, учуонай дьокутааттарбытын Наука күнүнэн эҕэрдэлиибит!
- 0
- 0
- 0
- 0
- 0
- 0