Бырайыак хаамыыта Ил Дархан Айсен Николаев болҕомтотугар киириэҕиттэн лаппа тэтимирбит. Ол курдук, балаҕан ыйыгар баттаныллыбыт сүбэлэҥ быһыытынан, тутуу уопсай суумата 1,5 млрд солкуобайга тэҥнэспит. Үбү «АЛРОСА» хампаанньа көрбүт. Онтон тэрээһин үлэтин СӨ «Үүнэр көлүөнэ пуондата» кэммиэрчэскэйэ суох тэрилтэ көҕүлүүр.
Санатан суруйдахха, өссө 2019 сыллаахха паарка архитектурнай кэнсиэпсийэтин уонна генеральнай былаанын оҥорууга бүтүн арассыыйатааҕы аһаҕас куонкурус түмүгүнэн «ATRIUM» (Москуба) диэн тэрилтэлэр холбоһуктара уонна «Восток+» (Дьокуускай) хааччахтаммыт эппиэтинэстээх тэрилтэ кыайыылаах тахсыбыттар. Бырайыак архитектура, бырайыактааһын уонна туттуу хайысхатыгар киэҥ эйгэҕэ биллэр, улаханнык биһирэнэр куонкурустарга, ол иһигэр норуоттар икки ардыларынааҕы таһымнаахтарга, үрдүк сыанабылы ылбыт, кыайыылааҕынан тахсыбыт. Бүгүҥҥү күҥҥэ бырайыак судаарыстыбаннай экспертизаны ааспыт, үлэ саҕаланарыгар тутар хампаанньаны кытта сөбүлэҥ баттаммыт.
Эспиэрдэр бэлиэтииллэринэн, тутуу өрөспүүбүлүкэ кимэн киириилээх сайдыытыгар өссө биир үктэлинэн буолар кыахтаах. Паарка сылы эргиччи үлэлиир уонна хотугу кыраай усулуобуйатын тулуйар гына былааннаммыт. Бырайыак уопсастыбаннай паарка эрэ буолбакка, ордук үөрэх эйгэтин киинин быһыытынан сыаналанар. Ол курдук, оҕо да, улахан да дьон предприниматель уонна креативнай сатабыллара сайдарыгар сүҥкэн суолталаах. Маны таһынан сынньалаҥ түһүлгэтэ буоларын быһыытынан араас тэрээһиннэри ыытар, успуордунан дьарыктанар, итиэннэ өйү-санааны, айар дьоҕуру уонна духуобунаһы сайыннарар зоналар аттарыллыбыттар.
«Бырайыакка ойууламмыттан 30%-нын да тутустахха, паарка аан дойду үрдүнэн бастыҥнар кэккэлэригэр киирэр кыахтаах», – диэн сыана быһар Архитектура норуоттар икки ардыларынааҕы академиятын бэрэпиэссэрэ, бырайыактары талар куонкурус дьүүллүүр сүбэтин кыттыылааҕа Александр Ложкин.
-
0
-
0
-
0
-
0
-
0
-
0
