Бүгүн Үөһээ Бүлүү улууһун Кэнтик нэһилиэгэр сааскы булка сылдьыбыт эр дьон кыттыһан, ытыктыыр, убаастыыр бэтэрээннэригэр кус бэристилэр. Маннык үтүө үгэс кэнтиктэргэ баар буолбута төрдүс сылыгар барда.
Валерий Николаев, Кэнтик нэһилиэгин баһылыга:
- Сарсын Ньукуолун күнэ буоларынан сибээстээн, бултуур-алтыыр дьоно суох тыыл, үлэ бэтэрээннэригэр, сэрии сылын оҕолоругар кус арааһыттан бэристибит. 29 киһи кыттыһан, 50 куһу 17 ыалга түҥэттибит. Бу анал аахсыйаны быйыл төрдүс сылын тэрийэбит. Итини таһынан, “Кэнтик булчута” күрэхтэһии түмүгүн таһаардыбыт. Манна сүрүн балаһыанньанан ким аан бастаан хааһы уонна куһу үс бастакынан бултаабыт дьон хабыллаллар. Ол курдук, быйылгы сезоҥҥа Кэнтик үрдүнэн бастакы хааһы Марк Чыбыков, бастакы куһу Александ Усов, иккис куһу Арылхан Мойтохонов уонна үһүс куһу Александр Павлов бултааннар кыайыылаах таҕыстылар. Күрэхтэһии бириистээх пуондатыгар уолаттар кыттыһан, 220 ботуруону биэрбиттэрэ. Онон бастакы миэстэлээх 100, иккис 80, үһүс 40 ботуруону ыллылар. Онтон хааһы бултаабыт Марк Чыбыковка Кэнтик чап уустарыттан төрүттээх тимир ууһа Павел Константинов саха быһаҕын бэлэхтээтэ.
Ирина Николаева, учуутал:
- Дьэ, сарсын Ньукуолун күнүгэр кус амсайар дьон буоллубут. Балтыбын кытта олоробун. Олус диэн үөрдүбүт аҕай. Кэнтик эр дьоно маннык саас аайы кус биэрэр буолбуттара хаһыс да сыллара буолла. Адьас үтүө үгэскэ кубулуйда. Сарсын Ньукуолуҥҥа амсайаары, биэрбит кустарын хайы-үйэ үргээн бүтэрдибит. Уолаттарга ис сүрэхтэн махтанабыт! Байанайгыт өлүүлээн куруук бэрсэ турдун!
-
0
-
0
-
0
-
0
-
0
-
0
