Тоҕус улууска баһылыктар, алта улууска улуус (оройуон) сэбиэтин дьокутааттара, 191 нэһилиэккэ баһылыктар итиэннэ 275 нэһилиэк сэбиэттэрин дьокутааттара талылыннылар.
Быыбар кэмигэр туох да улахан кэһии тахсыбата, быыбардыыр учаастактарга санаитарнай-сэрэтэр дьаһаллар толору тутуһуллан итиэннэ кэтээн көрөр тэриллэр туруорулланнар, хандьыдааттар уонна политическай баартыйалар өттүлэриттэн, уопсастыбаннай палаататтан уопсастыбаннай кэтээн көрөөччүлэр үлэлээннэр, куоластааһын сиэр-майгы быһыытынан, чиэһинэйдик ыытылынна.
Абый, Үөһээ Бүлүү, Дьааҥы, Бүлүү, Ленскэй, Мэҥэ Хаҥалас, Ньурба, Орто Халыма, Томпо улуустарын быыбардааччылара баһылыктарын таллылар. Барыллаан ааҕыы быһыытынан, быыбардааччыларын баһыйар үгүс куоластарын ылан, Үөһээ Бүлүү улууһун баһылыга Владимир Поскачин төрдүс болдьоҕор, Бүлүү улууһун баһылыга Сергей Винокуров үһүс болдьоҕор, Ленскэй улууһун баһылыга Жумарт Абильманов, Ньурба улууһун баһылыга Алексей Иннокентьев, Томпо улууһун баһылыга Яков Степанов иккис болдьохторугар баһылыгынан талылыннылар!
Түөрт улууска саҥа дьоннор кыайдылар: Абый улууһугар баһылыгынан бэйэтэ туруоруммут Владимир Новиков, Мэҥэ Хаҥалас улууһугар баһылыгынан Дмитрий Тихонов, Дьааҥы улууһугар Владислав Иванов, Орто Халыма улууһун баһылыгынан Иван Лаптев талылыннылар.
-
1
-
0
-
0
-
0
-
0
-
0
