Бу субуотаҕа уонна өрөбүлгэ Хомсомуол болуоссатыгар быыстапка-дьаарбаҥкаҕа киин куораттан, араас улуустартан чааһынай, бааһынай хаһаайыстыбалар, тыа хаһаайыстыбатын кэпэрэтииптэрэ, астыыр-таҥастыыр хампаанньалар итиэннэ аныгы алаас оҕолорун иитэн таһаарар агрооскуолалар, барыта холбоон бас билии көрүҥүттэн тутулуга суох 170 тэрилтэ, хаһаайыстыба кытта кэллэ.
Кинилэр бэйэлэрин бородууксуйаларын: үүт-эт, бурдук астарын, балыктарын, мүөттэрин, чэйдэрин, оҕуруоттарын аһын уо.д.а. аҕаланнар атыылыахтара. «Томпо» фактория кэпэрэтиип уонна Анаабыр улууһа таба тыһын, тыс этэрбэстэри атыылыы аҕалбыттар.
«Саха сүөһүтэ» судаарыстыба бүддьүөтүн тэрилтэтин асчыттара саха ынаҕын ыыс-араҕас арыытын тымтайга таптайан аҕалбыттар.
Племенной сүөһү быыстапкатыгар үүт уонна эт хайысхалаах ынах сүөһүнү, сылгыны, килиэккэлээх күндү түүлээҕи иитэр 13 племенной уонна племенной буоларга үлэлэһэр хаһаайыстыбалар кытыннылар.
Дьокуускай таһынааҕы Мархаттан Андрей Фурсо хаһаайыстыбата барааннары, козалары уонна өндүүктэри аҕалан, көрөөччү кэрэхсэбилин ылла.
Быыстапка-дьаарбаҥкаҕа 15 киһилээх экспертэр хамыыһыйалара тэриллэн үлэлиир.
Кинилэр сыаналыылларынан быыстапка-дьаарбаҥка бастакы күнүгэр, ол эбэтэр бүгүн, бүгүн 150 туонна ас-үөл батарыллыбыт. Быыстакпа сарсын эмиэ үлэтин салгыаҕа.
Икки күннээх үлэ түмүгүнэн төһө ас-үөл, бородууксуйа батарыллыбыта, ханнык хаһаайыстыба туох бородууксуйата бастаабыта уо.д.а. түмүк сарсын, «Ас-үөл – 2022» быыстапка-дьаарбаҥка сабыллыытыгар тахсыаҕа.
Бу туһунан сиһилии хаһыат кэлэр нүөмэригэр ааҕыаххыт.
-
2
-
0
-
0
-
0
-
0
-
0
