Өрөспүүбүлүкэ 14 улууһуттан бэйэлэрин бородууксуйаларын 115 тыа хаһаайыстыбатын табаарын оҥорооччулар, кэпэрэтииптэр, биирдэм урбаанньыттар уонна 16 агрооскуола аҕалан, үс күн устата 71 эргиэн туочукатынан 2 000 араас көрүҥ аһы-үөлү батардылар. Куорат олохтоохторо сибиэһэй эт, балык, мүөт уо.д.а. атыылаһан, кыстыыр арыыларын, хортуоппуйдарын, хаппыысталарын хааччынан үөрдүлэр.
Быыстапка-дьаарбаҥка бырагыраамата атыынан эрэ муҥурдаммата: АГАТУ-га тыа хаһаайыстыбатын исписэлиистэригэр, кэпэрэтииптэр чилиэннэригэр, АБДЬ кыттыылаахтарыгар анаан сэминээрдэр ыытылыннылар, Тыа хаһаайыстыбатын уонна ас-үөл бэлиитикэтин министиэристибэтигэр тыа хаһаайыстыбатын боломуочуйаларынан ыытыллар үлэ-хамнас итиэннэ агротехкылаастар тустарынан төгүрүк остуоллар тэрилиннилэр, Уопсастыбаннай кииҥҥэ тыа хаһаайыстыбатын табаарын оҥорооччуларга анаан «Тыа сирин күүһэ» диэн пуорум буолла.
Мэлдьи буоларын курдук, жюри бородууксуйа көрүҥнэринэн, хааайыстыбалар киэптэринэн кыайыылаахтары быһаарда. Саамай үрдүк наҕараада — Гран-при уонна «Саха Өрөспүүбүлүкэтин агробырамыысыланнай комплексын бастыҥ астыыр тэрилтэтэ» диэн көһө сылдьар былаах – Мэҥэ Хаҥалас улууһун Хорообут нэһилиэгин «Алаас-Ас» кэпэрэтиибигэр (бэрэссэдээтэл Светоний Шестаков) туттарылынна.
Муниципалитеттарга I миэстэни Дьокуускай куорат (16 мэтээл), II миэстэни Чурапчы улууһа (10 мэтээл), III миэстэни Мэҥэ Хаҥалас улууһа (9 мэтээл) ыллылар.
Хаартыска: Тыа хаһаайыстыбатын уонна ас-үөл бэлиитикэтин пресс-киинэ.
-
2
-
0
-
0
-
0
-
0
-
0
