Дугуйдаан Винокуров уонна Мичил Неустроев 2021 сыл кулун тутар 5 күнүттэн Өймөкөөн улууһуттан арахсан, биир сыл түөрт ый устата Арассыыйа араас уобаластарын нөҥүөлээн, бэйэлэрин дьулуурдарын уонна саха атын тулуурун көрдөрөн, дойду тэбэр сүрэҕэр Москва куоракка 2022 сыл от ыйын 15 күнүгэр айаннаан тиийбиттэрэ. Кинилэр бу уһун унньуктаах, хорсун айаннарын Саха Автономията 100 сыллаах өрөгөйдөөх үбүлүөйүн көрсө диэн сыал-сорук туруорунан тиийбиттэрин, бүттүүн саха норуота үөрэн-көтөн, сэргээн уонна киэн туттан, махтанан туран, бу үчүгэй сонуну уруйдаан-айхаллаан көрүстүлэр.
Дугуйдаан Винокуров кэргэнэ Екатерина Аркадьевна Үөһээ Бүлүү улууһун Нам нэһилиэгиттэн төрүттээх. Икки оҕолоохтор, кыыстара Диана бэһис кылааска, уоллара Дархан үһүс кылааска үөрэнэллэр. Бу уһун унньуктаах, сииги-силлиэни, уот куйааһы ортотунан айанныылларыгар, Дугуйдаан доҕоро Мичил Неустроев Новосибирскай куоракка тиийэн баран, атын хараҕа оһоллонон, Саха сиригэр төннүбүтүн кэннэ, Дугуйдаан Татарстан өрөспүүбүлүкэтин киинигэр, Казань куоракка диэри, соҕотоҕун айаннаан тиийбитэ. Казаньтан Москваҕа диэри 700 км. усталаах сири уола Дарханныын айаннаабыта.Бу айан саха атын тулуурун эрэ көрдөрөр буолбатах, оҕону өбүгэбит саҕаттан сүрүн дьарыкпытыгар сыһыаран үөрэтии, олоххо кытаанах тулуурдаах гына иитии боппуруостара буоларын эмиэ сонурҕуу, сыаналыы көрөбүт. Дугуйдаан Винокуров тылыттан-өһүттэн иһиттэххэ, үрдүк култууралаах, киэҥ билиилээх эдэр киһи буоларын сөхтүбүт-махтайдыбыт. Кини инники өттүгэр саха сылгытын өссө сайыннарар уонна төрүт сылгыбыт ахсаан өттүнэн элбииригэр кэккэ этиилэрдээх, былааннардаах. Уһун айаҥҥа араас дьону көрсөн, кэпсэтэн атын уобаластар сонун сирдэригэр сылдьан, кинилэр олохторун-дьаһахтарын уонна Дьөһөгөй оҕотугар истиҥ сыһыаннарын билсэн, элбэҕи билбит-көрбүт, ону инники үлэтигэр-хамнаһыгар туттар, туһанар баҕа санаалаах.
Кырдьык история кэрэһэлииринэн, 340 сыл анараа өттүгэр Тыгын Дархан сиэнэ Бөдьөкө уола Маһары, нууччатытан эттэххэ, Маһара Бозеков доҕотторун кытта Москва куоракка айаннаан тиийбиттэр эбит. 31 саастаах Дугуйдаан Винокуров саха саарына, киһи кэрэмэһэ буолан, бу 340 сыл анараа өттүгэр историяҕа киирбит айаны хатылаабыт, бастакы саха киһитэ буолбутунан бүтүн саха дьоно-сэргэтэ барҕа махтал тыллары этэбит, киэн туттабыт!
Степан Дмитриев, Үөһээ Бүлүү улууһун Балаҕаннаах нэһилиэгин баһылыга, Саха Өрөспүүбүлүкэтин норуотун хаһаайыстыбатын үтүөлээх үлэһитэ.
-
0
-
0
-
0
-
0
-
0
-
0
