Бу тэрээhин тута хас да кэрэ-бэлиэ дааталарга ананна: Арассыыйаҕа култуура нэhилиэстиэбэтин сылыгар, Саха Сирэ Арассыыйа састаабыгар киирбитэ 390 сылыгар, САССР тѳрүттэммитэ 100 сылыгар, Ленскэй нэhилиэгэр Аҕа сылыгар уонна, бастатан туран, биллэр судаарыстыбаннай уонна политическай диэйэтэл Максим Кирович Аммосов тѳрѳѳбүтэ 125 сааhыгар — кини Киргизия ѳрѳспүүбүлүкэтин тѳрүттээhиңңэ уонна «Манас» эпос сайдыытыгар оруолун бэлиэтигэр.
Манна СѲ Ил Түмэнин спикерын Александр Николаевич Жирков эрэдээксийэтинэн бу бырайыак чэрчитинэн тахсыбыт «Манаас: кыргыз героическай эпоһа» диэн кинигэтин санатар тоҕоостоох, 2014 сыллаахха бу кинигэ «Култууралар хардарыта дьайсыыларын уобалаhыгар бастың кинигэ» номинацияҕа кыайбыта уонна Арассыыйа кинигэ таhаарааччыларын Ассоциацияларын бырабылыанньатын «Сыл бастың кинигэтэ» дипломунан наҕараадаламмыта.
Сахалыы тылынан тахсыбыт «Манаас» эпос уонна кыргыз тылынан тахсыбыт «Дьулуруйар Н ьургун Боотур» саха олоңхотун презентациялара 2014 сыллаахха сэтинньи 13 күнүгэр Кыргызстан Ѳрѳспүүбүлүкэтин Бишкек куоратыгар ыытыллыбыта. Тылбаас үлэтэ бырайыак ааптара, Ил Түмэн спикерэ, «Аан дойду норуоттарын эпостара» норуоттар икки ардыларынааҕы Ассоциация вице-президенэ, Олоңхо Уон сылын бэлэмнээhиңңэ уонна ыытыыга Национальнай тэрийэр кэмитиэт бэрэссэдээтэлэ Александр Жирков уонна Кыргызстан Ѳрѳспүүбүлүкэтин Дьоруойа, Кыргызстан норуодунай суруйааччыта, «Аан дойду норуоттарын эпостара» норуоттар икки ардыларынааҕы Ассоциация президенэ, профессор Бексултан Жакиев салалталарынан ыытыллыбыта.
«Манаас» тылбааhыгар п.н.к. Тамара Петрова, «Күрүлгэн» литературнай альманах эрэдээктэрэ Афанасий Гуринов-Арчылан уонна Сунтаар улууhун Кутана с. фольклорнай-литературнай мусуой-Дьиэтин үлэhитэ Трофим Кириллин үлэлээбиттэрэ.
«Манаас» эпоhы сахалыы 125 эр киhи аахта, ол видеоҕа уhулунна. Кыттааччыларынан Нам улууhун, Ленскэй нэhилиэгин дьаhалталарын үлэhиттэрэ, аҕалар Сэбиэттэрин чилиэннэрэ, Нам гимназиятын үѳрэнээччилэрэ, М.К. Аммсоов тѳрѳѳбүт сирин — Хатырык с. олохтоохторо, 20 уол, 20 эр киhи, буоллулар.
Ити курдук 2022 сыл ахсынньы 22 күнүгэр Саха АССР тѳрүттээччилэртэн биирдэстэрэ, саха норуотун чулуу уола Максим Аммосов-Чаҕылхай Махсыым тѳрѳѳбүт күнүн ѳрѳгѳйдѳѳх бэлиэтээhин «Манаас» эпоhы саха тылынан ааҕыынан түмүктэммитэ ураты событиенан буолла.
-
0
-
0
-
0
-
0
-
0
-
0
