Уопсастыба

Онно Ил Түмэн Бэрэссэдээтэлин солбуйааччылар «Биир ньыгыл Арассыыйа» бэлитиичэскэй баартыйа фракциятын салайааччы Антонина Григорьева, «КПРФ» бэлитиичэскэй баартыйа фракциятын салайааччы Виктор Губарев, норуот дьокутаата, Бүтүн Арассыыйатааҕы норуот фронун эрэгийиэннээҕи толорор кэмитиэтин салайааччы Валерий Лютай, ааспыт сыллардаах бойобуой дьайыылар бэтэрээннэрэ, Сталинград кыргыһыытын кыттыылаахтарын ыччаттара, Губинскайдааҕы уокурук анал байыаннай эпэрээссийэ кыттыылаахтарын дьиэ кэргэттэрин кытары үлэҕэ бэбичиитэллэр сэбиэттэрин чилиэнэ Ольга Голдобина, Губинскай уокурук бэтэрээннэрин сэбиэтин бэрэссэдээтэлэ Светлана Степанова кыттыыны ыллылар.

Кэпсэтиини саҕалыырыгар кэллиэс дириэктэрэ Людмила Цой ыалдьыттарга кэллиэс бэрэпиэссэрэ, Арассыыйа үтүөлээх юриһа Александр Ким-Кимэн көҕүлээһининэн «Ийэ дойду туохтан саҕаланарый?» патриот ыччат кулуубун чилиэннэрэ преподавателлэри, бэтэрээннэри, уопсастыбаннас бэрэстэбиитэлэрин кытары атах тэпсэн олорон, олох сыаннастарын туһунан санаа атастаһыылара, суолталааҕы кэпсэтиилэрэ  үтүө үгэскэ кубулуйбута үс сыла буолбутун эттэ. Сааланы толору мустубут устудьуоннарга ыалдьыттары билиһиннэрдэ.

– Үтүө күнүнэн, күндү преподавателлэр, устудьуоннар, ытыктабыллаах ыалдьыттар, – диэн саҕалаата бэйэтин этиитин Ил Түмэн Бэрэссэдээтэлин солбуйааччы Антонина Григорьева. – Олунньу 2 күнэ биһиги дойдубут историятыгар бииир саамай бэлиэ даата буолар. Бу күн ньиэмэс фашистарын аармыйатыттан Сталинград куорат босхоломмута. Сталинградтааҕы кыргыһыы Аҕа дойду улуу сэриитин хаамыытыгар тосту уларыйыыны киллэрбит сүҥкэн суолталаах. Сэбиэскэй аармыйа кыайыыга хардыыта мантан саҕаламмыта, тииһигэр тиийэ сэбилэммит фашист үөрүн сэриитин сиһэ манна тостубута. Бүгүҥҥү көрсүһүүгэ бу кыргыһыыга кыттыбыт буойуттар оҕолоро, сиэннэрэ бааллара олус долгутуулаах, мин эмиэ Сталинградка сэриилэспит байыас сиэнэ буолабын. Эһэм 1942 с. алтынньыга Сталинград таһынааҕы Дубнону босхолуур иһин кыырыктаах кыргыһыыга олоҕун толук уурбута. Сталинградтааҕы кыргыһыыга 3 мөлүйүөн сэбиэскэй байыас, ол иһигэр Саха сириттэн ыҥырыллан тиийбит 10 тыһыынчаттан тахса саллаат кыттыбытын мин бүгүн санатыахпын баҕарабын. Эһиги патриотическай кулууп тэрийэҥҥит, үйэтитии үлэтин ыытаргыт уонна бэтэрээннэри кытары шефтэһэргит олус үөрүүлээх, хайҕаллаах. Губинскайдааҕы уокурук анал байыаннай эпэрээссийэ кыттыылаахтарын дьиэ кэргэттэрин кытары үлэҕэ бэбичиитэллэр сэбиэттэрин чилиэнэ Ольга Голдобина «Саха» НКИХ ханаалыгар «Якутск сегодня» биэриини таһаарар. Кини биһикки быйыл саҥа килииби бэлэмнии сылдьабыт, былырыыҥҥы килииппит патриотическай ырыа куонкуругар Гран-прини ылбыта. Эһиги, саҥа технологияҕа үөрэнэр эдэр дьон, үйэтитиигэ өссө үчүгэй матырыйаалары оҥороргутугар эрэнэбин.

Вице-спикер патриотическай иитиигэ өр сыллаах үтүө суобастаах, таһаарыылаах үлэлэрин иһин, өрөспүүбүлүкэ салалтатын аатыттан Инновация  технологияларын кэллиэһин идэҕэ туһаайар үлэҕэ отделын начальнига, Саха Өрөспүүбүлүкэтин үтүөлээх юриһа, сэрии уонна үлэ бэтэрээннэрин уопсастыбаннай тэрилтэтин бэрэссэдээтэлин солбуйааччы Василий Васильевка итиэннэ Гаврил Федоровка «Саха АССР 100 сыла» мэтээли, кэллиэс дириэктэрин иитэр үлэҕэ солбуйааччы Руслан Неустроевка уонна преподаватель Игорь Каштановка Ил Түмэн Махтал суруктарын туттарда.

Норуот дьокутааттара Виктор Губарев, Валерий Лютай итиэннэ Сталинград сэриитигэр кыттыбыт буойуттар оҕолоро: аатырбыт артиллерист Гавриил Протодьяконов сиэнэ Петр Протодяконов (Чурапчы), снайпер Егор Бугаев уола Егор Бугаев (Нам) «Төгүрүк остуолга» туох диэбиттэрин, тугу кэпсээбиттэрин туһунан сиһилии «Ил Түмэн» хаһыат кэлэр нүөмэригэр ааҕыаххыт.

Петр Павлов (Ил Түмэн) хаартыскаҕа түһэриилэрэ