Дьиҥэ, үлэ сокуонун үс гыммыт биирэ кэлэктиип дуогабарын нөҥүө быһаарыллар, онно үлэһит интэриэһин көмүскүүр пууннар киириэхтээхтэр. Ол оҥоһуллуутугар уһулуччу болҕомто ууруллуохтаах.
Сорох тэрилтэлэр кэлэктиип дуогабарыгар Үлэ кодексатын устан ылан туруораллар, ол сыыһа. Дуогабарга сокуону таһынан ылыллар мэктиэлэр баар буолуохтаахтар, ону таһынан, хамнас төлөбүрүн балаһыанньата, бириэмийэ хайдах бэриллэрэ хайаан да ыйылла сылдьыахтаах.
Кэлэктиип дуогабара үс сылга биирдэ ылыллар, ол эрэн үс сыл тухары уларыйбакка турар диэн буолбатах, эбии сөбүлэһии быһыытынан эбиилэр кэмигэр киирэ туруохтаахтар. Үгүстэр дуогабар эрдэ оҥоһуллубута диэн дьону чугаһаппаттар. Үлэһит кэлэктиип дуогабарыгар эбии пуун киллэрэр этиитин тэрилтэ салайааччыта ыйыллыбыт болдьоххо булгуччу көрүөхтээх.
“Аны ол дуогабарбыт үлэһит киһи хаһан баҕарар көрөр-истэр сиригэр баар буолуохтаах, холобур, сайтка. Үлэҕэ киирээччи, бастатан туран, кэлэктиип дуогабарын кытта билсиэхтээх.
Салалта соҥнуур дуогабарын буолбакка, үлэһит киһи интэриэһин көмүскүүр, дьон этиитин тиһэр дуогабар оҥоһуллуохтаах”, — диэн СӨ Профсойуустарын федерациятын бэрэссэдээтэлэ Николай Дегтярев быһаарар.
Онон үлэҕитигэр баар кэлэктиип дуогабарын биирдэ эмит өйдөөн көрөөрүҥ, үлэһит киһи интэриэһин көмүскүүр ханнык пуун баарын.
Хаартыска: https://www.solidarnost.org/
-
1
-
0
-
0
-
0
-
0
-
0
