Өрөспүүбүлүкэ күнүн бэлиэтиир дьаһал Ытык Күөлгэ Былатыан Ойуунускай аатынан искибиэргэ сибэкки ууруутунан уонна Былатыан Ойуунускай аатынан Судаарыстыбаннас түмэлигэр үөрэнээччилэргэ уруоктары ыытыттан саҕаланна. Салгыы Былатыан төрөөбүт Муҥха Дэлбэрийбит алааһыгар ыалдьыттар, улуус уопсастыбаннаһа, олохтоохтора кыттыылаах Сүгүрүйүү миитинэ буолла.
Миитиҥҥэ улуус баһылыга Михаил Соров, Саха Өрөспүүбүлүкэтин Бырабыытылстыбатын бэрэссэдээтэлин бастакы солбуйааччы Дмитрий Садовников, Октябрьскай нэһилиэк баһылыга Андрей Семенов тыл эттилэр. Ойуунускай Буор кутугар “Эн ииппит сүрэххин норуоппар биэрэбин” диэн Чөркөөх народнай театрын артыыстара Мариетта Бондарева, Прокопий Решетников, Туйаара Яковлева, Айгылаан Никифоров, Влада Дьяконова, Наталия Захаркина театрализованнай дьүһүйүүттэн быһа тардан толордулар.
Театр эдэркээн артыыстара, Чөркөөх орто оскуолатын бэһис кылаас үөрэнээччилэрэ Айхал Поисеев, Санаайа Филатова “Оҕо куйуурдуу турара” кэпсээнтэн быһа тардан аахтылар. Мустубут дьон Былатыан төрөөбүт балаҕаныгар, үөрэммит оскуолатыгар экскурсиялаатылар. Сүгүрүйүү миитинэ Былатыан Ойуунускай пааматынньыгар гирлянда уонна сибэкки дьөрбөтүн ууруунан түмүктэннэ.
Күнүстэн киэһэ култуурунай-спортивнай кииҥҥэ ыытыллыбыт үөрүүлээх тэрээһиҥҥэ улуус баһылыга Михаил Соров, өрөспүүбүлүкэ Бырабыыталыстыбатын бэрэссэдээтэлин бастакы солбуйааччы Дмитрий Садовников, Октябрьскай нэһилиэк баһылыга Андрей Семенов, Ил Түмэн дьокутаата Виктор Лебедев, Таатта улууһун дьокутааттарын Сэбиэтин бэрэссэдээтэлэ Валентин Охотин, биир дойдулаахпыт академик, т.н.д Александр Большаков, Чурапчы улууһун баһылыгын солбуйааччы Алексей Лобанов мустубут дьону эҕэрдэлээтилэр.
Бырабыытылыстыба бэрэссэдээтэлин бастакы солбуйааччы Дмитрий Садовников өрөспүүбүлүкэ уонна улуус сайдыытыгар тус кылааттарын, таһаарыылаах үлэлэрин иһин Махтал суруктары Алексей Новгородовка, Владимир Сицевка, улуус баһылыга Михаил Соров “Норуот хаһаайыстыбатын үтүөлээх үлэһитин” дастабырыанньатын Михаил Хаптагаевка, “Таатта улууһун сайдыытыгар кылаатын иһин” бэлиэни Лидия Богатыреваҕа, улуус Бочуотунай Грамотатын Елена Слепцоваҕа уо.д.а. туттардылар. Үөрүүлээх тэрээһини улуустааҕы норуот айымньыларын дьиэлэрин иһинэн үлэлиир бөлөхтөрүн, түмсүүлэрин кэнсиэрдэ киэркэттэ.
Бу курдук сыллата Саха Өрөспүүбүлүкэтин төрүттээбит улуу дьоммутугар сүгүрүйүү тэрээһиннэрэ ыытылланнар, хас биирдиибитин үлэҕэ-үөрэххэ кынаттыыллар.
-
14
-
0
-
0
-
0
-
0
-
1
