Бу бөлөҕү 2012 с. Дмитрий Корякин тэрийбитэ. Бөлөх састааба – Кэбэргэнэттэн төрүттээх уолаттар этилэр, кинилэр икки төгүл «Үрдэл» бириэмийэни ылбыттара, өрөспүүбүлүкэҕэ ыытыллар рок-бэстибээллэргэ көхтөөхтүк кыттыбыттара.
Дмитрий Корякин төрөөбүт улууһугар терапевт бырааһынан ананан кэлээт, «Байҕал» бырайыагын салҕаан, олохтоох ырыаһыттары, музыканнары түмэн, Өрөспүүбүлүкэ күнүгэр кэнсиэрт тэрийдэ. Маныаха улуус баһылыга Владимир Новиков, нэһилиэк баһылыга Айсен Мыреев, култуура дьиэтин дириэктэрэ Мичил Кириллин эдэр дьону өйөөннөр, бөлөх иккис тыынын ыларыгар көмөлөстүлэр.
Саҥалыы тэриллибит «Байҕал» ырыаһыттара Мичил Кириллин, Николай Максимов, Николай Аммосов, Дмитрий Корякин, Аида Антонова, Алина Потапова, Дария Алексеева бу күн элбэх ырыаны толордулар, Артем Михайлюк (гитара), Саша Бережнов (гитара), Павел Семенов (бас гитара), Николай Аммосов (клавишнай), Дмитрий Корякин (ударнай) музыканан доҕуһуоллаатылар. Кэнсиэрт үрдүк таһымҥа ааста.
Көрөөччүлэр бэркэ астынан тарҕастылар. Бу курдук, төрүт дорҕоонунан доҕуһуолланан, Абый улууһун култуурунай олоҕо үүнэр-сайдар.
-
10
-
0
-
0
-
0
-
0
-
0
