Набережнайга салгын олбохтоох мотуордаах тыылар тохтобулларын оҥорон, күн аайы үгүс-үтүмэн киһи ааһар, массыына тобус-толору симиллэн турар. Туох эрэ автовокзал курдук дьон аалыҥнас. Ол кэнниттэн табах, утах, ас тобоҕо таһынан барыар диэри урналар туолан туралларын ким даҕаны кэмигэр хомуйбат. Сайыҥҥы кэмҥэ киэһэ өттүгэр эдэр ыччат мустан, набережнайга кальян тардар сир оҥоһунна.
Сарсыарда эрдэ салгын сии таарыйа ыскамыайкаҕа олороору гыннахха, хайа саҕа табах тобоҕо, барыта сил буолар. Хаарыан набережнайбыт мотуор тохтобутулугар, дьон табахтыыр, силлиир-хаахтыыр сиригэр кубулуйбутун көрө сылдьан, сонньуйабыт эрэ. Кыайыы болуоссатын кытта ситимниир куорат биир кэрэ көстүүлээх набережнайын өрөмүөнүгэр бу сүүрбэччэ сыл тухары үп-харчы көстүбэтэ, бэрээдэк кыайан олохтоммото дьикти. Дьокуускай баһылыгын отчуотугар ол туһунан уокурук олохтоохторо эппиттэрэ-тыыммыттара ыраатта.
«Губинскай уокурук управатын быһыытынан, набережнайы оҥорорго эскиз күрэҕин биллэрбиппит. Ол күрэххэ Москва куоракка тиийэ эдэр дизайнердар, архитектордар кыттыбыттара. Түмүгэр Дьокуускайтан Анна Гасич кыайбыта.
Ити эскизпытын туппутунан куорат табыгастаах, уопсастыбаннай эйгэтин тэрийэр федеральнай күрэххэ кыттыбыппыт. Рейтинговай куоластааһыҥҥа Дьокуускай олохтоохторо Сайсары күөлү тупсарар туһугар куоластаабыттара. Роман Дмитриев аатынан набережнай иккис миэстэҕэ тахсыбыта, ону таһынан, куорат маастар-былааныгар киирэн, эбии үп көрүллүбүтэ», — диэн кэпсиир Гульжан Огонерова. Ааспыт нэдиэлэҕэ эрэ кини Губинскай уокурук управатын салайааччытын дуоһунаһыттан барбыта.
Тэрийэр кэмитиэккэ Ил Түмэҥҥэ Набережнай уокуруктан дьокутаат Мария Христофорова, араас эспиэртэр киирэн, уопсастыбаннай эйгэни тупсарыы үлэтэ быйыл саҕаланыахтаах.
Набережнайга амфитеатр, бэлэсипиэттээх, сатыы дьон сылдьар суола баар буолуоҕа, куорат сөтүөлүүр сирэ оҥоһуллуоҕа.
- 1
- 0
- 0
- 0
- 0
- 0