Уопсастыба

Дьыалабыай репутацияларын көрүнэр тэрилтэлэргэ офиснай дресс-код тутуһаллар. Төһө да өҥүрүк куйаас буолбутун иһин, үлэҕэ шортигынан, майканан, санныҥ, көхсүҥ көстөр аһаҕас сараппаанынан, кылгас дьууппанан, быһыыгын-таһааҕын ыга ыла сылдьар джинсынан сылдьар көҥүллэммэт. Атах таҥаһыгар офиска кроссовка, итиигэ шлепанцы, вьетнамка эмиэ сөбө суох. Киһи хараҕар быраҕыллар бижутерия, ыраахтан кылабачыйар киэргэл, үгүс-үтүмэн көмүс, уот кыһыл, чаҕылхай  дьүһүннээх тыҥырах лааҕа, помада дьыалабыай истиилгэ барсыбат.

Дресс-код үксүн килийиэннэри кытта үлэлиир тэрилтэлэргэ, улахан хампаанньаларга, бааннарга, былаас уорганнарыгар о.д.а. тутуһаллар. Хайа баҕарар тэрилтэҕэ бэйэтигэр барсар курдук дьоһуннаахтык таҥна сылдьар киһини сөбүлүү көрөллөр.

Офиска хайдах таҥнабыт?  

Светофор курдук ыраахтан сандааран, дьон болҕомтотун тарда сатаабакка, таҥаска хара, сиэрэй, хараҥа күөх өҥү талаллар, үлэһит киһини, бастатан туран, көстүүм киэргэтэр. Дьахталларга дьууппа, былааччыйа уһуна тобуккуттан үөһэ буолуо суохтаах, булууһаҥ илиигин сабыахтаах, классическай түүппүлэ хобулуга 3-7 см. үрдээбэт.  

Булууһаны араас ойуулааҕы-бичиктээҕи, килиэккэлээҕи буолбакка, биир дьүһүннээҕи, маҥаны, сырдык күөҕү талаллар. Киэргэлтэн тарбах аайы кылабачыйар биһилэх, күлүмүрдүүр сыапачыка оннугар биир обручальнай, сэмэй ытарҕа ордук. Сумка хаһыытыы сылдьар өҥнөөх буолбакка, эмиэ бэйэ бодотун тардынар гына ол-бу ойуута, киэргэлэ суоҕа биһирэнэр.   

Дьууппа алаараа тиийэн синньиирэ дьахтар быһыытын тупсарар, кыһын унтууну устан түүппүлэнэн сылдьар ордук. Сайын куйааска сото сыгынньах сылдьар дьыалабыай дьахтар уобараһыгар барсыбат, хайаан да чараас колготка, түүппүлэ кэтиллиэхтээх.

Үлэҕэ строгай былааччыйа таһынан өҥүнэн дьүөрэлэһэр жакет, эбэтэр моойго кэтэр дьоҕус былаат барсар. Оверсайз пиджак иһинэн биир өҥнөөх топ дьахтар уобараһын киэргэтэр.

Бүрүүкэни сөбүлүүр кэрэ аҥаардар самыыларын сабар пиджак, жакет кэтиэхтээхтэр. Үлэҕэ кэтэр сүрүн гардеробка икки-үс көстүүм, классическай дьууппа/бүрүүкэ, хас даҕаны булууһа киирэр. Уһун тэлээркэй дьууппа, түөскүн, бууккун көрдөрөр дириҥ тыраҕастаах былааччыйа, улахан баанчыктаах, араас киэргэллээх таҥас, булууһа нөҥүө ис таҥас курдары көстө сылдьара офиска барсыбат.

Көҥүл истиил

Кыра тэрилтэ үлэһиттэрэ, айар куттаах дьон көҥүл истиили тутуһан, күннээҕи үлэҕэ сибиитэрэнэн, джинсынан, чаҕылхай өҥнөөх таҥаһынан, итиигэ тэлээркэй сараппаанынан сылдьаллар. Ону ким даҕаны сүөргүлүү көрбөт.

Төһө даҕаны көҥүл истиил буолбутун иһин, ханнык баҕарар үлэҕэ дуоспуруннаахтык таҥнар дьону ылыналлар. Холобур, дьууппа трапеция, тюльпан быһыылаах, геометрическай кыра ойуулаах, горошектаах, сырдык, хараҥа дьүһүннээх буолуон сөп.

Бүрүүкэ көнө, классическай киэптээх, оттон былааччыйа быһыыгын-таһааҕын тиирэ ылбакка, кэҥэс соҕус, курдары көстүбэт хаачыстыбалаах халыҥ матырыйаалтан тигиллиэхтээх. Чэпчэки сыаналаах, катышка буолбут трикотаж дьалаҕай туттунуулаах, бэйэтин көрүммэт дьону туоһулуур.

Макияж киһи хараҕар быраҕыллыбат натуральнай, баттаҕыҥ укладкалаах, ыраас буолуохтаах, күндү таастаах улахан киэргэли рестораҥҥа кэтэр тоҕоостоох. Духууну сэрэнэн, чэпчэки, сибиэһэй сыттааҕы талар, кыраны ыстарар ордук, «ыарахан, хойуу» парфюм дьону тэйитэр.

Үлэҕэ барсыбат таҥас

Дьыалабыай дьахтар истиилигэр чэпчэки сыаналаах матырыйаалтан тигиллибит таҥас, курдары көстөр шифон, кылабачыгас былааччыйа, улахан ойуулаах дьууппа, суруктаах-бичиктээх футболка, маайка барсыбат. Леггинсы, эбэтэр халадаай курдук киэҥ ыстаан, үрдүк платформалаах, спортивнай атах таҥаһа хонтуораҕа сөбө суох.

Үлэҕэ киһи идэтин таһымын, сатабылын, дьыалабыай хаачыстыбатын көрдөрөр, ону сорохтор атын дьонтон, сиэрэй маассаттан уратыларын көрдөрө сатыыллар. Төһө да итии буолбутун иһин офиска джинсовай шортиктаах, гавайскай ырбаахылаах кэлбит киһини сэргии көрөллөрө саарбах.

Ону таһынан, үлэҕэ имиллибит-хомуллубут, бээтинэлээх таҥас, саба салыбырыы сылдьар трикотаж уобараскын түһэрэр. Таҥаһыҥ ыраас, уурбут-туппут курдук чөкө, бэйэҕэр барсар буолуохтаах.