Быһыыгар-таһааҕар лоп курдук олорор көстүүм, сыаналаах түүппүлэ, хаачыстыбалаах сумка, брендовай чаһы, ачыкы уобараскын тупсаран биэрэр. Биллэн турар, маннык туруору таҥнарга хамнаһыҥ эппиэттэһиэн наада.
Сааһырбыт дьахтар түөһэ аһаҕас сылдьара көрүөххэ бөрүкүтэ суох, онон былааччыйа бүтэй, кэҥэс соҕус буолуохтаах эрээри, халадаай быһыылаах халҕайа сылдьар киэҥ таҥас сааскын эбэн биэрэр.
Хараҥа дьүһүннээх таҥас киһини кырытыннарар, оттон сырдык сэргэхситэр. Хара былааччыйаҕа сырдык былаат барсыаҕа. Үгүс эдэр ыччат кыһын пуховигынан кыстыыр, дьоһун сааһыгар үктэммит дьахтарга бу таҥас сөбө суох, арай таһырдьа сибиэһэй салгыҥҥа хаамарга, салгын сииргэ тоҕоостоох.
Сааһырдым диэн ымсыырар таҥаскыттан аккаастанар эмиэ табыллыбат, саамай сүрүнэ, сааскар, быһыыгар-таһааҕар, үлэҕэр барсар, хамсанаргар табыгастаах буолуон наада. Биллэн турар, офиска 50-чатыгар чугаһаабыт дьахтар хобулуктаах түүппүлэнэн дугунан, күнү супту көтө-дайа сылдьара уустук соҕус, онон атах таҥаһа судургу, хаамарга чэпчэки буолуохтаах.
Хаартыска: https://pulse.mail.ru/
-
0
-
0
-
0
-
0
-
0
-
0
