«СӨ үөрэҕин сайдыыта» судаарыстыбаннай бырагыраама чэрчитинэн, «Үөрэхтээһин» национальнай бырайыак өйөбүлүнэн 5900 кв.м. иэннээх оскуола тутуллуоҕа.
«Төһө да уустук кэм бүрүүкээбитин иһин, Сахабыт Сиригэр Арассыыйа Бэрэсидьиэнэ Владимир Путин киллэрбит национальнай бырайыактарын көмөлөрүнэн сыл ахсын социальнай эбийиэктэр тутуллаллар», — диэн билиһиннэрдэ Айсен Николаев.
Ил Дархан Ил Түмэн бэрэссэдээтэлигэр Алексей Еремеевка махтанна, спикер туруорсуутунан оскуола тутуута Федерация Сүбэтин түмүк докумуонугар киирбитэ. Алексей Еремеев 1980 с. бу оскуола бастакы кылааһын боруогун атыллаабыта, кини билии эйгэтигэр бастакы хардыыларын оҥороругар сирдээбит кыһатын устуоруйатын, үтүө үгэстэрин, үүнэр көлүөнэни иитиитин ахтан-санаан ааста.
«Биһиги бу үөрүүлээх күнү олус өр күүппүппүт, билигин тутааччылар үлэни хаачыстыбалаахтык оҥорон, кэмигэр бүтэриэхтэрин наада», — диэн эттэ кини.
Бырайыак быһыытынан, 5854,87 кв.м. иэннээх оскуолаҕа 17 үөрэнэр кылаас, спортивнай, аактабай саала баар буолуоҕа. Нам уокуругуттан дьокутаат Алексей Еремеев смета быһыытынан, 671 611,1 тыһ. солк. сыаналаах Нам 2 №-дээх орто оскуолатын тутуутун саҕалыырга «СӨ социальнай-экэнэмиичэскэй сайдыытын судаарыстыбаннай өйөбүлүн» туһунан РФ Федеральнай Мунньаҕын Федерация Сүбэтин уурааҕын барылыгар этии киллэрбитэ. Уураах барылын Федерация Сүбэтигэр буолбут Саха Өрөспүүбүлүкэтин күннэригэр 2022 с. ахсынньы 22 күнүгэр ылыммыттара.
Бу докумуоҥҥа олоҕуран, Ил Дархан Айсен Николаев РФ Үөрэҕин миниистиригэр Сергей Кравцовка сурук ыыппыт. Суругар 2023 уонна кэлэр 2024-2025 сс. федеральнай инвестиционнай бырагыраамаҕа бастакы уочарат Намҥа 450 миэстэлээх оскуола тутуутун киллэрэргэ көрдөспүт.
Онон быйыл оскуола тутуутугар өрөспүүбүлүкэҕэ 193 021,10 тыһ. солк. көрүллүбүт. Хаалбыт харчыны өрөспүүбүлүкэ бүддьүөтэ үбүлүөхтээх.
Күн бүгүн 6-8 кылаас үөрэнээччилэрэ иккис симиэнэнэн үөрэнэллэр. Уруок аактабай саалаҕа, бибилэтиэкэҕэ, фойеҕа кытта ыытыллар. Оскуола 1963 с. 250 үөрэнээччигэ ананан тутуллубута, оттон билигин 644 оҕо үөрэнэр. Эргэрбит дьиэ аныгы ирдэбилгэ эппиэттээбэт.
Нам улууһун баһылыга Юрий Слепцов этэринэн, үлэни хаачыстыбалаахтык оҥороллорун уопсастыбаннай хонтуруол кэтээн көрүөҕэ. Оскуола саҥа дьиэтин 2024 с. ахсынньытыгар тутан бүтэриэхтээхтэр. Тутааччы — «АЭБ-Капитал» ХЭТ, генеральнай дириэктэр Игорь Борисов.
Ил Түмэн пресс-сулууспата
-
0
-
0
-
0
-
0
-
0
-
0
