Кэмпириэнсийэ кыттыылаахтара уопут атастаһыыга, хоту дойду дьонугар-сэргэтигэр олус дьоһун суолталаах хайысханы сайыннарыы суолун тобуларга уонна дьүүллэһиигэ муһуннулар. Мунньах саҕаланыыта кэмитиэт бэрэссэдээтэлэ Михаил Гуляев тэрээһин кыттыылаахтарын уонна ыҥырыылаах ыалдьыттарын ыһыаҕынан эҕэрдэлээтэ. Ону тэҥэ, кэмпириэнсийэ ыытыллар күнэ мээнэ күҥҥэ талыллыбатаҕын бэлиэтээтэ. Ол курдук, ыһыах туһунан успуорт көрүҥнэригэр чаҕылхай күөн көрсүһүүлэринэн уонна өрөгөй үөрүүлээх түгэнинэн биллэр. Ыҥырыылаах ыалдьыттарынан СӨ Физическай култуураҕа уонна успуорка миниистир Лениод Спиридонов, РФ Наукаҕа уонна норуоттар икки ардыларынааҕы сыһыаннаһыыларын успуорка министиэристибэтин Олимпийскай резервэ училищеларын үөрэххэ Департаменын начаалынньыга Денис Антонов, Олимпийскай резервэ училищеларын дириэктэрдэрин Сэбиэтин бэрэссэдээтэлэ, Москуба уобалаһын Бронницы куорат Олимпийскай резервэҕэ судаарыстыбаннай училищетын дириэктэрэ Сергей Берлин, успуорка үөрэхтээһин тэрилтэлэр, Саха Сирин, Красноярскай кыраай, Брянскай уобалас училищеларын Олимпийскай резервэлэрин салайааччылара, Красноярскай кыраай кёрлинг Федерациятын вице-бэрэсидьиэнэ Сергей Веневцев, Кузбасска керлинг Федерациятын Бэрэсидьиэнэ Наталья Сизикова буоллулар. Тыл этээччилэр ортолоругар улахан болҕомтону Сергей Иванович Красноярскай кыраай Уһук хоту уонна Аартыка оройуоннарыгар Красноярскай колледж олимпийскай резервэтигэр керлинг кластернай көрүҥүн сайыннарыытын туһунан этиитэ тарта.
Кини Красноярскай кыраайга керлинг устуоруйатын уонна кыраай киинин уопута хотугу оройуоннарга туһынныллыбытын туһунан сырдатта. 2011 с. Красноярскай училище Олимпийскай резервэтигэр бастакы керлинг оонньуу таастара ылыныллыбыт, оттон киин сүүрэр стадиоҥҥа туһааннаах дорожката оҥоһуллубут. Төһө даҕаны былаһаакката аһаҕас халлаан анныгар оҥоһуллубутун үрдүнэн, элбэх оонньуон баҕалаахтары хомуйбут. Ити кэннэ профессиональнай каадырдары бэлэмнииргэ наадыйыы үөскээбит. 2014 с. Красноярскай кыраай училищетын (техникум) олимпийскай резервэтин баазатыгар керлинг салаата аһыллыбыт. Билигин кыраай хоту оройуоннарыгар кёрлинг оонньуутугар болҕомто күүһүрэр, саҥа успуорт эбийиэктэрэ тутуллаллар, тириэнньэрдэр састааптара хомуллар.
Сиһилии олимпийскай резервэ училищетын сайыннарыытын туһунан Р.М. Дмитриев аатынан өрөспүүбүлүкэтээҕи училище Олимпийскай резервэтин дириэктэрэ Семен Чердонов кэпсээтэ. Оттон Олимпийскай резервэ училищеларын дириэктэрдэрин Сэбиэтин бэрэссэдээтэлин солбуйааччы, Брянскай судаарыстыбаннай училище Олимпийскай резервэтин дириэктэрэ Алексей Солонкин училище холобуругар устудьуоннар успуорка кулууптарын тэрийиитин уонна хайдах дьаһанан олороллорун туһунан сырдатта. ХИФУ физическай култуураҕа уонна успуорка институтун дириэктэрэ Николай Гоголев университет иһинэн устудьуоннарга физическай иитиигэ уонна успуорт сайыннарыытыгар 2030 сылга диэри стратегияны олоххо киллэриитин туһунан дакылаат аахта. Киэҥ ыҥырыылаах мунньахха VIII-с сайыҥҥы норуоттар икки ардыларынааҕы успуорт оонньууларын дирекциятын генеральнай дириэктэрэ Михаил Сивцев Аартыкаҕа уонна Уһук хоту успуорду сайыннарыы «Азия оҕолоро» бырайыак иһинэн кэскиллээҕин бэлиэтээтэ.
Түмүккэ Михаил Гуляев научнай-практическай кэмпириэнсийэ кыттыылахтарыгар махталын биллэрдэ уонна кытаанах доруобуйаны, эйэни, сомоҕолоһууну баҕарда.
Ил Түмэн пресс-сулууспата
-
0
-
0
-
0
-
0
-
0
-
0
