Михаил Ефимович Николаев аатын үйэтитэр сыаллаах хамыыһыйа СӨ Баһылыгын анал быһаарыытынан сотору кэминэн үлэтин саҕалыаҕа. Улуу киһи, Саха Сирин уонна Арассыыйа чулуу уолун туһунан өйдөбүл үйэлэргэ хаалыаҕа.
Айсен Николаев эппитинэн, Михаил Ефимович саҥа Саха Сирин сайыннарыы Стратегиятын өссө ааспыт үйэ 90-с сылларыгар, Сэбиэскэй Сойуус ыһыллыбыт ыарахан кэмигэр төрүттээбитин бэлиэтээтэ. Ол уустук бириэмэҕэ өрөспүүбүлүкэ элбэх хайысхаҕа инники күөҥҥэ тахсыбыта, ол иһигэр киһи хапытаалын, социальнай эйгэни сайыннарыыга, оскуолалары, балыыһалары, спортивнай комплекстары тутууга. Олохтоох бырамыысыланнас ыһыллыбакка-тоҕуллубакка оннунан хаалбыта, экэниэмикэ саҥалыы уларыйан, Саха Сирэ дойду кэккэ бөдөҥ хампаанньаларын ахсааннарыгар киирбитэ, “АЛРОСА” АХ тэриллибитэ. Судаарыстыбаннай тутул уларытыллыбыта, саҥа Конституция ылыныллыбыта, былаас саҥа уорганнара, ол иһигэр Ил Түмэн баар буолбуттара.
«Михаил Ефимович Саха Сирин олохтоохторун олохторо тупсарыгар, норуоппут ахсаана элбииригэр ахсаабат кыһамньытын уурбута. Кини үлэтэ-хамнаһа, санаата-толкуйа бүтүннүү өрөспүүбүлүкэ инникитин түстээһиҥҥэ, оҕону-ыччаты сайыннарыыга түмүллэрэ», - диэтэ Баһылык. Ол курдук, СГУ дьиэлэрэ тутуллубуттара, Муусука Үрдүкү оскуолата, хореографическай училище, Цииркэ тэриллибиттэрэ. Михаил Ефимович көҕүлээһининэн аан бастаан «Азия оҕолоро» Оонньуулар ыытыллыбыттара. Кэлэр сылга Дьокуускайга ыытыллар VIII Международных спортивных игр «Азия оҕолоро» Норуоттар икки ардыларынааҕы спортивнай оонньууларга Михаил Николаев аатыгар сүгүрүйүөхпүт.
«Кини инники өтө көрөр кыаҕа билигин биһиги элбэх хайысхаларга дойду лиидэрдэрэ буоларбытыгар, эрэллээхтик сананарбытыгар көмөлөһөр, тирэх буолар», – диэн Айсен Николаев түмүктээтэ.
СӨ Баһылыгын уонна СӨ Бырабыыталыстыбатын пресс-сулууспатын матырыйаалынан.
-
1
-
0
-
0
-
0
-
0
-
0
