Кини улуус киниттэн Лөгөй нэһилиэгэр тахсан, Анатолий Бурнашев салайар бааһынай хаһаайыстыбатыгар ньирэй көрөөччүнэн үлэлээн олохтоохтору сөхтөрдө. «Сайылык уолана» дэттэ. Биһиэхэ сайылыкка, буолаары буолан улуус кииниттэн оҕо кэлэн үлэлээбэтэҕэ ыраатан, бастаан «пахай, аҕыйах хонугунан күрүүрэ буолуо» диэччилэр көстүбүттэрэ. Ол эрээри, Эрсаан ыал улахан оҕотун быһыытынан олус эппиэтинэстээх. Кыра сааһыттан кыһыҥҥы уонна сайыҥҥы уһун өрөбүллэригэр манна, эһэтигэр Лэгэнтэйгэ кэлэн, хотонунан-ходуһанан көмөлөһөр идэлээх.
Бэйэтэ кэпсииринэн, саҥа суотабай атыылаһарыгар дьонуттан харчы көрдүөн баҕарбатах, тутууга үлэлээри ыйыталаспытыгар «оскуола оҕотун бэйэбит эппиэппитигэр ылбаппыт» диэбиттэр. Онуоха аҕата: «Үлэ барыта үчүгэй, Кэптэнигэ Анатолий Бурнашев хаһаайыстыбатыгар ньирэй көрөөччү наада үһү», – диэбитин истэн, манна кэлбит.
Туойа сайылыкка олорор, үлэлиир усулуобуйа тупсаҕайдык тэриллибитин олус сөбүлээбит. Үлэһиттэр олорор дьиэлэрэ сабыс-саҥа, туттар тэрил, иһит-хомуос барыта баар, сөтүөлүүр сир чугас уонна олус чуумпу, салгына ып-ыраас диир. Настаабынньыга Петр Петрович Бурнашеву кытары 67 ньирэйи иккиэ буолан көрбүттэр. Ыанньыксыттар аппаратынан ынахтарын ыабыттарын кэнниттэн, ньирэйдэрин анал далга хаайан аһатар эбиттэр. Кинилэр сарсыарда 6 чаастан туран үлэлиир буоллахтарына, Любовь Тапырова, Алексей Дмитриев уонна Анатолий Ефремов өссө эрдэ туран, ынахтарын ыылларын сөҕөр. Кинилэр 73 ынахтан күҥҥэ 600 киилэ кэриҥэ үүтү ыабыттарын, Любовь Тапырова сэпэрээтэринэн эрийэн, «Мүрү-Ас» кэпэрэтиипкэ сүөгэйинэн туттарар эбит.
– Оттон биһиги ньирэйдэрбитин аһатан бүтээт, мэччирэҥҥэ үүрэбит уонна киэһэ 5 чаастан сылгылаан аҕалан, киэһээҥилэрин аһатабыт, – диир Эрсаан.
Үлэһит уолчаан ол быыһыгар, сарсыарда 11 чаастан киэһэ 4-кэ диэри эһэтин кытары оттоспут. Ити курдук, биир ый устата тиргиччи үлэлээн, Эрсаан бастакы хамнаһын, 30 тыһыынча солкуобайы илиитигэр тутан, хаһаайыстыба баһылыгар Анатолий Семеновичка махтанар. Даҕатан эттэххэ, кини эһэтэ Иннокентий Васильевич Бурнашев Уус Алдан улууһугар биир бастакынан, 1993 с., бааһынай хаһаайыстыбатын тэринэн үлэлээбит, билигин да кэтэх хаһаайыстыбатын тутан олорор ытык киһи буолар.
-
5
-
0
-
0
-
0
-
0
-
1
