Ол курдук, Түмүк нэһилиэгин ытык-мааны ыала, Саха Сирин көмүс кинигэтигэр киирбит10 оҕолоох Дария Федоровна, Дмитрий Николаевич Яковлевтар уоллара — Саха Өрөспүүблүкэтин үтүөлээх тутааччыта, Дьокуускай куорат бочуоттаах тутааччыта, Түмүк нэһилиэгин бочуоттаах олохтооҕо Федор Дмитриевич Яковлев нэһилиэкпит олохтоохторо өр сылга кэтэспит баҕа санааларын толорон, төрөөбүт дойдутугар айан аартыгар тупсаҕай кѳстүүлээх бэлиэни талааннаах дьону кытта оҥорон, төрөөбүт дойдутугар бэлэх уунна.
Федор Дмитриевич талааннаах дьону түмэн, бу кэскиллээх тутуу олоххо киирдэ. Стела ааптара —аан дойду таһымнаах быыстапкалар, муус уонна хаар оҥоһуктарга ѳрѳспүүбүлүкэтээҕи күрэхтэр призердара, Л.А. Ким аатынан художественнай оскуола педагога, скульптор Анна Дмитриевна Саввина. Ону кытта М.П. Шадринова, К.Р. Птицын, А.А. Яковлев биир санаанан үлэлэстилэр уонна Маар орто оскуолатын учуутала Анетта Павловна Григорьева керамогранит билиитэни уурда.
Саха омук сиэринэн Алиса Михайловна Иннокентьева алгыс түhэрдэ.
Ааспыт нэдиэлэҕэ буолбут аартык бэлиэтэ аhыллар үөрүүлээх түгэнигэр эҕэрдэ тылларын Ньурба улууhун аҕа баһылыга А.М. Иннокентьев уо.д.а. эттилэр.
Үйэлээх тутуу нэһилиэк дьоно киэн тутта кэпсиир бастыҥ тутуута буоллун. Төрөөбүт төрүт дойдубут үүнэ-сайда, чэчирии-чэлгийэ турдун!
-
6
-
0
-
0
-
0
-
0
-
0
