Маҥнайгы Бэрэсидьиэммит Михаил Ефимович Николаев төрүттээбит оонньуулара аан дойдуга киэҥник хардыылаан, успуорт бары көрүҥэр саҥаттан саҥа ааттары таһааран, бу эйгэ сайдыытыгар сүрдээх улахан кылааты киллэрэ сылдьаллара мэлдьэҕэ суох. Саха сирэ бу буолуохтаах оонньуулары эҥкилэ суох үрдүк таһымнаахтык ыытар сыаллаах бэлэмнэнэр. Ол курдук, Билим аччыгый академиятыгар волонтердар тим-лиидэрдэрин бэлэмниир анал үөрэх аһылынна, манна эдэр дьон хамаанданы тэрийэн үлэлэтии ымпыгар-чымпыгар уһуйуоллахтара, маны тэҥэ дьыалабыай кэпсэтии этикэтин, араас дойдулар култуураларын, успуорт эйгэтин туһунан билиилэрин чиҥэтиэхтэрэ. Бэлиэтээн эттэххэ, тим-лиидэрдэр диэн волонтердары иилээн-саҕалаан үлэлэтэр дьону ааттыыллар.
«Оонньууларга икки тыһыынча курдук волонтер үлэлиэҕэ, ол иһигэр Арассыыйа атын эрэгийиэннэриттэн уонна омук дойдуларыттан, - диэн бэлиэтиир Саха Сирин баһылыга Айсен Николаев.
«Волонтердар бары анал таҥаһынан уонна аһылыгынан хааччыллыахтара”, - диир Айыллаан Винокуров, Саха Сирин добровольчествотын киинин директора.
Үөрэххэ кэлбит эдэр дьон волонтер буолалларыттан улаханнык үөрэллэр.
«Миэхэ бу курдук улахан аан дойдутааҕы оонньууларга волонтердуурум олус үөрүүлээх. Билиибит хаҥыыр, элбэх саҥа доҕоттордонобут, биир сыаллаах-соруктаах хамаанда буолан үлэлиэхпит. Биһиги оонньууга кэлбит спортсменнарга көмө буолабыт, дойдубут туһунан кэрэ өйдөбүлү биэрэбит. Онон волонтер буоларым миэхэ улахан чиэс”, - диэн санаатын үллэстэр Давид Павлов.
«Мин элбэх күрэхтэһиигэ волонтерунан үлэлээбитим. Бэйэм боксанан дьарыктанабын, атын успуорт көрүҥнэрин эмиэ интэриэһиргиибин. “Азия оҕолоро” аҥардас успуорка эрэ ситиһии буолбатах, ордук успуорт саҥа эбийиэктэрэ тутуллан киирэллэриттэн үөрэбин”, - бэлиэтиир үөрэх курсаана Иннокентий Киренский.
-
0
-
0
-
0
-
0
-
0
-
0
