1950 сыллаахха Холбоһуктаах нациялар тэрилтэлэрин Генеральнай Ассамблеята ахсынньы 10 күнүн Киһи быраабын аан дойдутааҕы күнүнэн олохтуурга бары судаарыстыбалары ыҥырбыта. Онтон ыла бу күн Киһи быраабын аан дойдутааҕы күнүн быһыытынан сыллата бэлиэтэнэр.
Быйыл, ахсынньы 4 күнүгэр ыытыллыбыт Арассыыйа Бэрэсидьиэнин иһинэн үлэлиир Киһи быраабын сэбиэтин сүбэ мунньаҕар Владимир Путин маннык эттэ: «Хомойуох иһин, быйылгы үбүлүөйү биһиги киһи быраабын хааччыйыы уонна көмүскээһин аан дойдутааҕы тиһигэр кэхтии бара турар уустук кэмигэр бэлиэтиибит... Эһиги билэргит курдук, Арассыыйа быраабы араҥаччылыыр аан дойдутааҕы сорох тэрилтэлэр кэккэлэриттэн таҕыста. Ол эрээри, биһиги ити Декларация принциптэриттэн аккаастаммаппыт, төттөрүтүн интэриэстээх судаарыстыбалары уонна партнердары кытары бииргэ үлэлииргэ, киһи быраабын араҥаччылааһын ситимин оҥорорго кырдьыктаах, көдьүүстээх быһаарыыны булар туһугар бэлэммит».
Киһи быраабын аан дойдутааҕы күнэ диэн, бу – киһи быраабын көмүскээһин биһиги барыбыт, судаарыстыба уонна уопсастыба, уопсай сорукпут итиэннэ киһи, кини бырааба уонна көҥүлэ үрдүкү сыаннас буоларын өссө төгүл санатыы. Киһи быраабын уонна көҥүлүн тутуһуу – гражданин былааһы кытары сэһэргэһиитэ, киһи олоҕор-дьаһаҕар сыһыаннаах быһаарыылары ылынарга уопсастыба санаатын уонна гражданнар интэриэстэрин учуоттааһын.
Өрөспүүбүлүкэ олохтоохторун бүтүн аан дойдутааҕы быраабы араҥаччылыыр институт бүгүҥҥү үтүөкэннээх бырааһынньыгынан эҕэрдэлиибин, чэгиэн-чэбдик доруобуйаны, этэҥҥэ буолууну, ситиһиилэри баҕарабын!
Саха Өрөспүүбүлүкэтигэр киһи быраабыгар боломуочунай Сардаана Гурьева
- 1
- 0
- 0
- 0
- 0
- 0