Сүрүн иһитиннэриини Бэтэринээрийэ департаменын салайааччы Петр Петров оҥордо. Өрөспүүбүлүкэ бэтэринээринэй сулууспатыгар барыта холбоон 1 736 үлэһити түмэр Бэтэринээрийэ департамена, ресурсанан хааччыйар хаһыанай тэрилтэ уонна биэдэмистибэ иһинэҕи 29 тэрилтэ, ол иһигэр 376 лечебница (пуун, учаастак), 26 бэтэринээринэй чинчийэр лаборатория, 7 бэтэринээринэй санитарнай экспертиза лабораторията, биир өрөспүүбүлүкэтээҕи бэтэринээринэй чинчийэр лаборатория бааллар.
«Быраас дьону эмтиир, оттон бэтэринээр киһи аймаҕы эмтиир», -- диэн мээнэҕэ этиллибэт. Киһи доруобуйата тулалыыр эйгэтиттэн, иитэр сүөһүтүттэн, кыылыттан, аһыыр аһыттан, иһэр уутуттан тутулуктаах. Ити иһин, бэтэринээрдэр дьиэ кыылларыгар-көтөрдөрүгэр эмтиир-сэрэтэр дьаһаллары утумнаахтык тэрийэллэр, миэстэҕэ оҥоһуллар тыа хаһаайыстыбатын бородууксуйатын итиэннэ өрөспүүбүлүкэ таһыттан аҕалыллар аһы-үөлү уонна төһө кыалларынан, айылҕа кыылын-сүөлүн эмиэ көрөллөр-истэллэр. Сайын эмтээх оттору хомуйаллар уонна хаһаайыстыбалар оттообут отторун анаалыстыыллар. Ааспыт сайын айылҕа үчүгэй хараҕынан көрөн, ханна даҕаны от анаалыһа үчүгэй түмүктэммит.
Өрөспүүбүлүкэ үрдүнэн 160 411 ынах сүөһү (99 % ), 30 985 ыт (66,9 % ), 2 290 сылгы (1,4 % ), таба 0,8 %-а чиптэммит. 2024 сылга дьиэ кыыла барыта маркировкаланыах тустаах.
2020 с. ылыллыбыт 498 №-дээх, кыылга-сүөлгэ эппиэтинэстээх буолуу туһунан федеральнай сокуонунан ыытыллар үлэ тумнуллубата. Дьэллик ыттары дьаһайарга үс сыл устата 80-нуу мөл. солк. субсидия көрүллэн, 13 приют уонна 11 тутар пуун, а.э. улуус ахсын кэриэтэ баар буолбут.
Матырыйаалы сиһилии хаһыат кэлэр нүөмэригэр билсиэххит.
-
0
-
0
-
0
-
0
-
0
-
0
