Ахсынньы 24 күнүгэр Марфа уонна Сергей Расторгуевтар ааттарынан Саха Өрөспүүбүлүкэтин судаарыстыбаннай циркатыгар күүтүүлээх, дьэрэкээн, алыптаах «Ил Дархан Харыйата-2023» ыытылынна. Бырааһынньык «Туундара күнэ» цирковой остуоруйанан саҕаланна. Манна артыыстар бэртээхэйдик дьиэ кэргэн түмсүүтүн, оҕолор төрөппүттэрин кытары сыһыаннарын, хорсун-хоодуот майгыны толору арыйдылар. Дьэ, кырдьык, туруорааччы режиссер Мария Харлампьева-Попова талааннаах үлэтэ, сырата, оҕолорго кыһамньыта көһүннэ. Өрөспүүбүлүкэбит Ил Дархана Айсен Сергеевич Николаев бастыҥ үөрэнээччилэри эҕэрдэлээтэ.
- Сахабыт Сирин кэскиллэрэ – эһигини уруйдуубун. Биһиэхэ бэртээхэй, талааннаах ыччат улаатарыттан олус үөрэбин. Эһиги үөрэххэ, үлэҕэ, успуорка, култуураҕа ситиһиилэргитин көрөбүн, билсэбин. Эһиги ситиһиилэргит – биһиги ситиһиилэрбит! Туйгуннук үөрэнэргититтэн, олимпиадаларга, айар куонкурустарга, научнай-практическай кэмпириэнсийэлэргэ ситиһиилэргититтэн, успуорка кыайыыларгытыттан эһигини кытары тэҥҥэ үөрэбит», - диэн Айсен Николаев эттэ.
Кини кэлэн иһэр 2024 сыл Саха Сиригэр Оҕо саас сылынан биллэриллибитин санатта. Эһиил саҥа оскуолалар, успуорт комплекстара, култуура дьиэлэрэ тутуллуохтара, оҕолор харысхаллаахтарын туоһулуохтара.
Ил Дархан үөрүүлээх сонуннары үллэһиннэ. Үөрэнээччилэр билиилэрин хаҥаталларыгар, кыайыы үксүүрүгэр анаан Арассыыйатааҕы олимпиадалар кыайыылаахтарыгар 500 тыһ. солк., оттон призердарга 100 тыһ. солк. ананыа. Маныаха тустаах уураах номнуо илии баттаммытын этэн туран, быйылгы сыл кыайыылаахтарыгар истиҥ эҕэрдэтин тириэртэ.
Эһиил биир бэлиэ тэрээһининэн «Азия оҕолоро» норуоттар икки ардыларынааҕы оонньуулар буолуохтара. Ил Дархан бу оонньуулар Аан Дойду оҕолорун түмэрин уонна оҕолор нөҥүө дойдулар икки ардыларыгар доҕордоһуу үөскүүрүн бэлиэтээтэ: «Сахабыт Сирин маҥнайгы Бэрэсидьиэнэ Михаил Николаев 1996 сылга көҕүлээн тэрийбит маҥнайгы оонньууларыттан саҕалаан, «Азия оҕолоро» биһиги оҕолорбутун түмэр сыаллах. Оҕолор икки ардыларыгар үөскээбит доҕордоһууттан норуоттан, дойдулар икки ардыларыгар истиҥ сыһыан үөскүүр. Хомойуох иһин, дойдубут утары араас сааҥсыйалар олохтоноллорун көрөбүт, ол иһигэр успуорка эмиэ. Мин эрэнэбин, биһиги успуорка бырааһынньыкпыт дьиҥ чахчы доҕордоһуу бырааһынньыгынан буолуо. Кэлэн иһэр 2024 сыл эһиэхэ, төрөппүттэргитигэр, дьиэ кэргэҥҥитигэр, өрөспүүбүлүкэбитигэр уонна улуу дойдубутугар үтүөнү эрэ аҕаллын!», - диэн эҕэрдэлээтэ. Маны этэн туран Ил Дархан Айсен Сергеевич сыл бастыҥ 10 үөрэнээччитигэр анал истипиэндийэлэри туттарда.
Бастыҥ үөрэнээччилэр:
- Семен Необутов, Дьокуускайдааҕы кадетскай оскуола 11 кылааһын үөрэнээччитэ;
- Кристина Дрозд, өрөспүүбүлүкэтээҕи олимпийскай резерва училищатын 9 кылааһын үөрэнээччитэ;
- Виктория Алексеева, Бүлүү улууһун Тылыгын орто оскуолатын 11 кылааһын үөрэнээччитэ;
- Максим Поповский, Өлүөхүмэ оройуонун 4 №-дээх орто оскуола 11 кылааһын үөрэнээччитэ;
- Магомед Наурузов, Мэҥэ Хаҥалас улууһун Аллараа Бэстээх М.Е.Попов аатынан орто оскуола 11 кылааһын үөрэнээччитэ;
- Любовь Слепцова, Абый оройуонун А.Е.Слепцов аатынан орто оскуола 10 кылааһын үөрэнээччитэ;
- Александра Дмитриева, Дьокуускайдааҕы В.П.Ларионов аатынан физико-техническай лицей 10 кылааһын үөрэнээччитэ;
- Власий Югов, Дьокуускайдааҕы классическай гимназия 11 кылааһын үөрэнээччитэ;
- Арсен Михайлов, Горнай улууһун А.Н.Осипов аатынан Бэрдьигэстээх орто оскуолатын 11 кылааһын үөрэнээччитэ;
- Татьяна Гарипова, Өймөкөөн оройуонун Усть-Нера орто оскуолатын 11 кылааһын үөрэнээччитэ.
Өрөспүүбүлүкэ үөрэнээччилэрин ааттарыттан Дьокуускай куорат классическай гимназиятын 11-с кылааһын үөрэнээччитэ Власий Югов Ил Дархаҥҥа махтал тыллары эттэ.
«Сахабыт Сиригэр араас тэрээһин ыытыллар буолан, оҕолор талааннарын арыйалларыгар, кыайыы өрөгөйүн, ситиһииттэн үөрүүнү билэллэригэр кыах баар. Бу сыл дойдубут Бэрэсидьиэнэ Владимир Путин Ыйааҕынан Педагог уонна уһуйааччы сылынан биллэриллибитэ. Өрөспүүбүлүкэбит үөрэнээччилэрин ааттарыттан тапталлаах учууталларбытыгар барҕа махталбытын тиэрдэбит. Кинилэр сүҥкэн үлэлэрин түмүгэ - биһиги ситиһиилэрбит уонна кыайыыларбыт.
Убаастабыллаах Айсен Сергеевич! Эһиги оҕолор көҕүлээһиннэрин өрүү өйүүгүт, уонна баҕа санаалара олоххо киирэригэр усулуобуйа тэрийэҕит. Кэлэн иһэр сылы Оҕо саас сылынан биллэрилиннэ. Онон эһиил оҕолор өссө улахан болҕомтону уонна өйөбүлү өрөспүүбүлүкэбититтэн ылыахпыт», — диэн үөрүүтүн эттэ.
Мустубут оҕолор ааттарыттан Ил Дархаҥҥа «Сосновый бор» сынньалаҥ уонна чэбдигии киинин иитииллэччилэрэ сылгы сиэлиттэн өрүллүбүт панно бэлэх ууннулар.
-
1
-
0
-
0
-
0
-
0
-
0
