Онон, бүгүҥҥү үөрүүлээх үтүө-мааны күҥҥэ, Улуу Кыайыы күнүгэр, кини аатын ааттаабатахха сатаммат курдук. Тоҕо диэтэххэ, 1945 сыллаахха Ытык Күөлгэ ыһыллыбыт Улуу Кыайыы ыһыаҕын түһүлгэтин Иван Васильевич сирин ыйан, анаан-минээн киэргэтэн, ойууларын уруһуйдаан, билиҥҥи Сэбиэскэй Сойуус Дьоруойа, биир дойдулаахпыт Федор Матвеевич Охлопков аатын сүгэр Култуура уонна сынньалаҥ пааркатыгар ыстарбыта.
Ыһыах түһүлгэтин киэргэтиини, уруһуйдарын оҥорууну барытын Иван Васильевич сүрүннээбитэ. Бэйэтэ төһө даҕаны улаханнык ыарытыйдар, Ытык Күөлгэ баар уран тарбахтаах, уруһуйдуур, уһанар талба талааннаах дьону түмэн үлэлэппитэ. Оннук көмөлөспүт дьоннортон биирдэстэрэ Чөркөөх Ханньаһыттан төрүттээх, Таатта, Амма, Ньурба оруйуоннарыгар үп салаатыгар үлэлээбит Баһылай Адаамабыс Дьарааһынап буолар. Ол туһунан кыраайы үөрэтээччи Көстөкүүн Мөлөкүүрэп ахтан турар.
Улуу Кыайыы ыһыаҕар Иван Васильевиһы массыынаҕа олордон, түһүлгэҕэ киллэрэн, бочуоттаах эргиири оҥотторон таһаарбыттара, бар дьонугар көрдөрбүттэрэ. Кини ити кэнниттэн ыарыыта өрө туран, сотору кэминэн олохтон туораабыта. Сэрии, сут-кутурҕан сылларыгар доруобуйата улаханнык айгыраабыта, аас-туор олох охсуута буоллаҕа. Дмитрий Кононович Сивцев-Суорун Омоллоон Иван Васильевич Попов өлбүтүн кэннэ: «Кини сэрии сылларынааҕы хоргуйуу уонна аччыктааһын содулуттан өллө», -- диэбитин оччотооҕу кырдьаҕастар ботур-итир кэпсэтэр буолаллара диэн истэбит.
Петр Захаров, Ил Түмэн дьокутаата Прокопий Рахлеев көмөлөһөөччүтэ.
Дьохсоҕон.
-
1
-
0
-
0
-
0
-
1
-
0
