Төгүрүк остуолга Госдуума дьокутааттара, араас кэмитиэттэр чилиэннэрэ, министиэристибэлэр, биэдэмистибэлэр салайааччылара итиэннэ тустаах эрэгийиэннэр бэрэстэбиитэллэрэ, дьокутааттара кыттыыны ыллылар. Кэпсэтиини саҕалыырыгар Судаарыстыбаннай Дуума дьокутаата, Уһук Илини уонна Аартыканы сайыннарыы кэмитиэтин бэрэссэдээтэлэ Николай Харитонов уокурукка АПК сайдар кэскилэ киэҥин бэлиэтээтэ.
– Сайдыы биир тирэҕинэн ынах сүөһүнү иитии буолуон сөп, тоҕо диэтэххэ, манна бөдөҥ сир баана баар уонна уу ресурсаларын тииһилэҥэ үчүгэй. Ити үүт хайысхатын сайыннарыыга улахан оруоллаах. Оттон табаны иитии бииринэн эт салаатын кэҥэтэргэ уонна Хоту, Сибиир, Уһун Илин төрүт олохтоох омуктара түөлбэлээн олорор сирдэригэр социальнай-экэнэмиичэскэй сайдыы туруктаах буолуутугар олук буолар, – диэтэ Николай Харитонов.
Санаа атастаһыытын түмүгэр ылыллар Сүбэ барылыгар Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов Арассыыйа Федерациятын Бырабыыталыстыбатыгар үс этиини киллэрдэ:
‒ «Табаны иитии туһунан» федеральнай сокуон саҥа эрэдээксийэтин барылын оҥорорго;
‒ таба хаһаайыстыбаларыгар таба мэччирэҥин сыһыарар туһунан боппуруоһу сүрүннүүр нуормаламмыт быраап аакталарын федеральнай таһымынан ылынарга;
‒ Арассыыйа Федерациятын Бырабыыталыстыбата 2020 сыл балаҕан ыйын 16 күнүгэр таһаарбыт «Баһаартан сэрэхтээх буолуу быраабылаларын бигэргэтэр туһунан» 1479 №-дээх уурааҕынан бигэргэммит Арассыыйа Федерациятыгар Баһаартан сэрэхтээх буолуу быраабылаларын 185-с пуунун 1-кы абзаһыгар уларытыы киллэрэн, Уһук Хотугу дойдуга тыа хаһаайыстыбатыгар туһаныллар сирдэргэ сэтиэнэх оту, хадьымалы уматары көҥүллүүргэ.
Маны таһынан сис кэмитиэт Арассыыйа Федерациятын Тыатын хаһаайыстыбатын министиэристибэтигэр маннык этиини оҥордо:
‒ «Сылгыны иитэр-ууһатар, туһанар уонна батарар сыаллаах көрүү-истии бэтэринээринэй быраабылаларын бигэргэтэр туһунан» Арассыыйа Федерациятын Тыатын хаһаайыстыбатын министиэристибэтэ 2023 сыл ахсынньы 23 күнүгэр таһаарбыт бирикээһигэр, чуолаан 3-с пууҥҥа «Бу бирикээһинэн бигэргэммит Быраабыла сылгыны үөрдээн иитиигэ туттуллубат» диэн этиини киллэрэн биэрэргэ.
Бу туһунан Ил Түмэн сайта суруйар
Хаартыскаҕа Василий Кононов (Ил Түмэн) түһэриитэ
-
0
-
0
-
0
-
0
-
0
-
0
