Баахынайга түөрт эдэр ыал бу дьиэҕэ көһөр. Ол курдук, саҥа дьиэҕэ олохтоох уот ыстаансыйатын маастара Михаил Ильинов иитээччи идэлээх кэргэнинээн Любовь Васильевналыын уонна үс оҕолорунаан, эмиэ электрик Васильев Анатолий Валерьевич, кэргэнэ оҕо саадын үлэһитэ Сардана Николаевна үс оҕолорунаан, оскуола суоппара Николаев Ньургун Николаевич, кэргэнэ Зоя Егоровна түөрт оҕолорунаан көһүөхтэрэ. Лииндэ оскуолатын исписэлииһэ Карамзина Юлия Петровна, кэргэнэ Торговкин Григорий икки оҕолорунаан сокуоннай хаһаайын буолан үөрүүлээх быһыыга-майгыга күлүүстэрин туттулар.
Бастакы толору хааччыллыылаах дьиэҕэ барыта элбэх оҕолоох эдэр ыал көһөн киирбиттэрин эҕэрдэлээн, нэһилиэк баһылыга Антонов Н.И., хотугу аҕыйах ахсааннаах норуоттар ассоциацияларыттан Мусалямова З.Н., бэтэрээннэр Васильева М.И., Слепцова Г.И. алгыстарын тиэртилэр, бэлэхтэрин туттардылар. Оттон култуура бэтэрээнэ Марфа Иннокентьевна Антонова аал уоту оттон, алгыс сиэрин-туомун толордо. Саҥа дьиэҕэ көһөн киирээччилэртэн лиэнтэни Сардана Николаевна быста.
Дьиэ “Сахам сирэ XXI үйэҕэ” бырагырааманан олоххо киирдэ. Көҥдөйүн олохтоох тутуу тэрилтэтэ “Үрдэл” тутта, оттон иһинээҕи үлэлэрин быйыл кулун тутартан саҕалаан Дьокуускай куораттан сылдьар “Якутия” ХЭТ үлэһиттэрэ ситэрдилэр-хотордулар. Билигин саҥа дьиэҕэ киириэхтээх хаһаайыттар хомуналлар, кырааскаланаллар, бэйэлэрэ сөбүлүүллэринэн дьиэлэрин ис бараанын тупсараллар.
“Эдьигээн сонуннара” хаһыат.
-
0
-
0
-
0
-
0
-
0
-
0
