Биһиги норуоппутугар былыргыттан тутуһуллар олус үчүгэй сиэр-майгы баар- кыһалҕаҕа киирбит дьону бары түмсэн, тутуһан өйөөн-көмөлөһөн, салгыы олох устун бииргэ тутуспутунан айаннаан иһэргэ дьулуһуу диэн. Ким хайдах кыайарынан, сатыырынан, билэринэн...
Ыам ыйын 29 күнүгэр “Ил Түмэн” парламент хаһыатыттан уонна сонуннары киэҥник тарҕатар “Сахамедиа” , “Кэскил” тэрилтэлэриттэн суруналыыстар, үлэһиттэр чөлүгэр түһэрии үлэтигэр кыттыһан, сарсыарда Нам тырассатынан айаннаан иһэн, халаан уутуттан босхоломмут сирдэри чөлүгэр түһэрии үлэтэ күргүөмнээхтик ыытылла турарын көрөбүт. Хатыҥ-Арыы нэһилиэгин дьаһалтатыгар тиийэппитин, баһылыгы солбуйааччы Герман Марков көрсөн, тута Кыраап Биэрэгэр баар техникумҥа бараҕыт диэн, ханна, кимҥэ тиийэрбитин эттэ, контактарын биэрдэ. Дьаһалта таһыгар уонунан тиэхиньикэ -прицептаах, куопсуктаах Беларусь тыраахтардар, ыарахан уйуктаах Камаас массыыналар тураллар, күннээҕи сорудахтарын чуолкайдаһаллар.
Намнааҕы техникумҥа дириэктэр, толуу көрүҥнээх Ньургустаан Жирков кылгастык билиһиннэрээт, үлэҕит боруонун тэрилтэ эппиэттээх үлэһитэ көрдөрүөҕэ диэн салайда. “Эбийиэктэрбит бэйэлэрэ да эргэ тутуулар, өрөмүөн күүһүнэн тураллар. Халаан уутуттан хоромньу улахан. Чөлүгэр түһэриигэ өрөспүүбүлүкэбит дьоно-сэргэтэ бу курдук бары өйөөн көмөлөһө туралларыттан үөрдүбүт, махталбыт муҥура суох ”, -диэн техникум преподавателэ Леонид Соловьев биһиги бөлөхпүт тугу үлэлиэхтээҕин быһаарда. Онон тута техникум территориятын халаан уутун кэнниттэн хаалбыт бөҕү ыраастааһыныгар туруннубут.
Техникум территорията 100 % халаан уутугар барбыт. Уу халыйаатын тутатына устудьуоннары чугастыы Хатыҥ Арыы нэһилиэгин киинигэр Аппааныга тэриллибит быстах олорор пууҥҥа көһөртөөбүттэр. Орто анал үөрэхтээһин тэрилтэтин икки үөрэнэр куорпуһа, устудьуоннар икки уопсайдара муосталарын үрдүнэн уу халыйбыт. Билигин эбийиэктэр муосталарын, акылааттарын көтүрэн, куурда, матырыйаалларын тиэйэ-таһа сылдьаллара көстөр. Техникум үлэһиттэрэ бары биир киһи курдук үлэлии сылдьаллар.
Норуот күүһэ-көмүөл күүһэ ыарахан түгэҥҥэ көстөр. Биһигини кытта тэҥҥэ Дьокуускайтан элбэх киһилээх оптуобус кэлэн техникум олбуоругар тохтоото. Түһээттэрин кытта билбиппит - Дьокуускайдааҕы тыа хаһаайыстыбатын техникумун үлэһиттэрэ кэлбиттэр. Көмөлөһө кэлбит бөлөҕү үөрэх тэрилтэтин хаһаайыстыбаннай чааһын сэбиэдиссэйэ Степан Павлов салайан аҕалбыт. «25 киһи кэллэ, билигин бу 2 Камаас массыынаны кытта погрузчигы батыһан туспа территорияны ыраастааһыҥҥа барарга сордуахтанныбыт», -диэт, бары туттар тэриллэрин тутан күргүөмүнэн тиэхиньикэ кэнниттэн батыстылар. Ити курдук, Дьокуускайдааҕы техникум үлэһиттэрэ уонна устудьуоннара Кыраап Биэрэгинээҕи биир идэлээхтэрин өйөөн, куруук да тутуспутунан алдьархайдары аһардан, ыарахаттары этэҥҥэ туораан, олоҕу өрө тутан инники хардыылаан истиннэр.
-
0
-
0
-
0
-
0
-
0
-
0