Алаас аныгы хаһаайыттарын иитэн таһаарар агрооскуолалар 35 (28 кыһыл көмүс, 3 үрүҥ көмүс, 4 боруонса) мэтээлинэн, М.Г.Сафронов аатынан ТХНЧИ уонна кини дьоҕус инновационнай тэрилтэлэрэ 12 кыһыл көмүс, 3 үрүҥ көмүс, 1 боруонса мэтээлинэн, РФ Тыатын хаһаайыстыбатын министиэристибэтин икки Махтал суругунан бэлиэтэннилэр. Астыыр-таҥастыыр кэпэрэтиииптэр уонна бааһынай хаһаайыстыбалар бородууксуйалара үрдүк сыанабылы ыллылар. «Горнай-Ас» кэпэрэтиип үс, Сунтаар улууһа үстүү мэтээли туттулар.
«Саха сүөһүтэ» генопуонда тэрилтэтин астыыр кымыһа, арыыта уонна убаһатын этэ, Мархатааҕы сибиинньэ комплексын саҥа бородууксуйата кыһыл көмүс мэтээллэринэн бэлиэтэннилэр.
Племенной уонна табаарынай сүөһүнү иитии салаатыгар «Саха сүөһүтэ» генопуонда тэрилтэтэ, «Болугур» кэпэрэтиип (Амма), «Үчүгэй» АУо (Өймөкөөн), Мичил Прокопьев бааһынай хаһаайыстыбата (Дьокуускай) кыһыл көмүс, «Сахаагроплем» судаарыстыба бүддьүөтүн тэрилтэтэ үрүҥ көмүс мэтээлинэн наҕараадаланнылар. АГАТУ учуонайдара оҥорбут босуобуйалара хамыыһыйа үрдүк сыанабылларын ыллылар.
– Биһиги быыстапкаҕа сыл ахсын бородууксуйа саҥа көрүҥнэрин, ол иһигэр агрооскуолаларбыт бородууксуйаларын, туруорабыт. Маннык быыстапкаларга кыттыы – Саха сирин бородууксуйатын оҥорон таһаарааччыларын федеральнай таһымҥа көрдөрөр, араас эрэгийиэннэр бэрэстэбиитэллэригэр билиһиннэрэр, үрдүк хаачыстыбатынан, иҥэмтиэлээх эттигэ баайынан, минньигэһинэн уратыланар бородууксуйаларбытын билэллэригэр кыаҕы биэрэр, – диэтэ тыа хаһаайыстыбатын уонна ас-үөл бэлиитикэтин миниистирэ Артем Александров.
Быйыл 26-с сылын ыытыллар Бүтүн Арассыыйатааҕы «Көмүс күһүн» агро-бырамыысылыннай быыстапкаҕа Саха сириттэн 100-тэн тахса экспонент кыттан, бэйэлэрин бородууксуйаларын көрдөрдүлэр.
Дэлэгээссийэ чилиэннэрэ салааларынан тыырсан, сүөһүнү иитиигэ, кэпэрээссийэҕэ, сиртэн үүнээйини ылыыга уо.д.а. анаммыт төгүрүк остуолларга, мунньахтарга кытыннылар.
Бастайааннай Бэрэстэбиитэлистибэ дьиэтигэр «Саха Өрөспүүбүлүкэтин агробырамыысаланнай комплексын туруктаах технологическай сайдыыта» тиэмэнэн эспиэрдэри кытары дьыалабыай көрсүһүүлэр тэрилиннилэр, бииргэ үлэлиир туһунан сөбүлэһиилэр түһэрсилиннилэр. Бу туһунан министиэристибэ пресс-киинэ иһитиннэрэр.
Хаартыскаҕа Анна Сергучева түһэриитэ
-
5
-
0
-
0
-
0
-
0
-
0
